Գերմանական Bosch ընկերությունը սպառողական էլեկտրոնիկայի CES-2020 միջազգային ցուցահանդեսի ընթացքում ներկահացրել է ավտոմեքենաների մեջ կիրառման համար նախատեսված ադպատիվ արևապաշտպանիչ հովարը: Դրա առանձնահատկությունը գերժամանակակից տեխնոլոգիան է, որն իրենից ներկայացնում է թափանցիկ հեղուկբյուրեղյա վահանակ՝ բջջային նախշազարդ հիշեցնող պատկերով: 

Ըստ կատարված ուսումնասիրությունների, ուժեղ հանդիպակաց լուսավորությունը մոտ 16 տոկոսով մեծացնում է լուրջ ճանապարհա-տրանսպորտային պատահարի հավանականությունը: Այս խնդիրը լուծելու համար Bosch-ի ինժեներները նախագծել են հատուկ ադապտիվ հովար, որն ունենալով ՀԲ-վահանակի տեսք, հաղորդակցվում է վարորդի գլխի շարժումներին հետևող տեսախցիկի հետ: Սա թույլ է տալիս  «խելացի» համակարգին մգեցնել հովարի վեցանկյուն հատվածներն այնպես, որպեսզի ստվերվի միայն վարորդի աչքերի հատվածը, իսկ հովարի մեծ մասը մնա թափանցիկ և չփակի տեսադաշտը: 

Bosch-ում ընդգծում են, որ ներկայացված տեխնոլոգիան միայն նախատիպ է, որը ենթակա է հետագա լրամշակումների և կատարելագործման, և այդ իսկ պատճառով դեռ վաղ է խոսել սերիական ավտոմեքենաներում նման օպցիա կիրառելու մասին: Մինչ այդ Bosch-ը ներկայացրել էր լուծում, որը կոչված է հեռախոսների կիրառումը սահմանափակելուն: