Կանադայի Գրան-պրին ողջ մրցաշրջանի առավել հետաքրքիր փուլերից մեկն է և առաջինը, որտեղ բոլիդները կարգավորվում են ցածր սեղմիչ ուժով աշխատելու համար: Բացի այդ թիմերի մեծ մասն այստեղ ստանում են նոր շարժիչներ: Գումարած Մոնրեալի հիասքանչ մթնոլորտը՝ կստանանք իսկական շոու, որին սպասում են երկրպագուները:

Երեք տարվա բացարձակ գերիշխանությունից հետո, այս տարի Mercedes-ն իր դիրքերը զիջեց մրցակիցներին: Այսպես, մարզումային օրերին իրեն հավասարը չուներ Red Bull-ը, իսկ որակավորման փուլում լավագույն արդյունքը ցույց տվեց Ferrari-ի ներկայիս առաջատար՝ Սեբասթիան Ֆեթելը: Ինչպես միշտ առաջին վեց հորիզոնականնեը միմյանց հետ բաժանեցին երեք առաջատար թիմերի պիլոտները:

Հաշվի առնելով, որ կանադական մրցուղին հարմար է վազանցների համար՝ ենթադրվում էր, որ պայքարը կլինի  բավական սուր և անզիջում: Մեկնարկից հետո Ֆեթելը կարողացավ պահպանել առաջատարի դիրքը, նրա հետևում Ֆերսթապենը անհաջող գրոհ ձեռնարկեց Բոթասի դիրքերի վրա, իսկ մյուս Red Bull-ի ղեկին Դանիել Ռիկիարդոն առաջ անցավ Կիմի Ռայկկոնենից:

Սակայն ինչպես Կանադայում կայացած գրեթե բոլոր մրցափուլերի ժամանակ, այս անգամ էլ պիլոտները չկարողացան խուսափել խոշոր վթարից: Արդեն երկրորդ շրջանին Williams-ը ներկայացնող Լենս Սթրոլը և Toro Rosso-ի մրցարշավորդ Բրենդոն Հարթլին բախվեցին ուղիղներից մեկի վրա, ինչի հետևանքով երկուսն էլ դուրս մնացին պայքարից: Այս վթարն, ի դեպ, ևս մեկ անգամ ապացուցեց, որ Ֆորմուլա 1-ի ներկայիս բոլիդներն աչքի են ընկնում անվտանգության չափազանց բարձր մակարդակով, քանի որ արտաքինից գրեթե ամբողջովին քանդված ավտոմեքենաներից պիլոտները դուրս եկան առանց որևէ նկատելի վնասվածքի:

Անվտանգության մեքենան մի քանի շրջան անցկացրեց մրցուղում, քանի դեռ մարշալները հավաքում էին բեկորները: Դրա հեռանալուց հետո պայքարը հիմնականում թևակոխեց մարտավարական փուլ: Պիլոտները, մանավանդ միավորային գոտում գտնվողները, չափազանց զգույշ էին և գործում էին գրեթե անսխալ: Եղանակն էլ իր հերթին չէր նպաստում զանազան մարտավարական հնարքների կիրառմանը, ինչի հետևանքով լուրջ պայքար այլևս չստացվեց: 

Չնայած այն հանգամանքին, որ սխալմամբ մրցափուլի ավարտը տրվեց մեկ շրջան ավելի շուտ, Սեբասթիան Ֆեթելը վստահորեն պահպանեց առաջատարի դիրքը՝ 14 տարվա ընդմիջումից հետո Ferrari-ին պարգևելով Կանադայում հաղթելու բերկրանքը և դրան զուգահեռ վերադառնալով ընդհանուր հաշվարկի առաջին հորիզոնական: Երկրորդը եզրագիծը հատեց Վալթերի Բոթասը, երրորդը Մաքս Ֆերսթապենն էր: Բացի նշված երեք մարզիկներից միավորներ վաստակեցին նաև Դանիել Ռիկիարդոն, Լյուիս Հեմիլթոնը, Կիմի Ռայկկոնենը, Նիկո Հյուլկենբերգը, Կարլոս Սայնսը, Էսթեբան Օկոնն ու Շարլ Լեկլերը: 

Հատկանշական է, որ համեմատաբար հաջող մեկնակից հետո երկրորդ մրցափուլն անընդմեջ միավորներ չվաստակեցին McLaren-ի պիլոտները: Ալոնսոն, որը երկար ժամանակ ընթանում էր միավորային գոտում, 42-րդ շրջանին դուրս մնաց պայքարից ուժային ագրեգատի հզորության կորստի պատճառով, իսկ Սթոֆել Վանդորնն էլ, վնասելով անվադողերը առաջին շրջաններին, գործնականում զրկվեց միավորների համար պայքարելու հնարավորությունից: Սա թույլ տվեց Renault-ին մեծացնել առավելությունը բրիտանական թիմի նկատմամբ Կոնստրուկտորների գավաթում:

Հաջորդ Գրան-պրին կկայանա Ֆրասնիայում՝ հանրահաը Պոլ-Ռիկար մրցուղում: Ակնկալվում է ուշագրավ պայքար, որին մենք ևս կհետևենք՝ մեր ընթերցողներին այն ներկայացնելու նպատակով:

1. Սեբասթիան Ֆեթել, Ferrari –         121 միավոր

2. Լյուիս Հեմիլթոն, Mercedes –          120 միավոր

3. Վալթերի Բոթաս, Mercedes –         86 միավոր

4. Դանիել Ռիկիարդո, Red Bull –        84 միավոր

5. Կիմի Ռայկկոնեն, Ferrari –              68 միավոր

1. Mercedes AMG Petronas Motorsport-    206 միավոր

2. Scuderia Ferrari –                                   189 միավոր

3. Aston Martin Red Bull Racing –              134 միավոր

4. Renault Sport Formula 1 Team –              56 միավոր

5. McLaren F1 Team –                                  40 միավոր