Ֆորմուլա E առաջնության հերթական փուլը կայացավ շվեյցարական Ցյուրիխ քաղաքում և ավարտվեց գործող չեմպիոն՝ Լուկաս դի Գրասիի հաղթանակով, որն առաջինն էր բրազիլացու համար ընթացիկ մրցաշարջանում: Իսկ մրցափուլն ինքնին նշանավորեց ավտոսպորտի վերադարձը Շվեյցարիա՝ 63 տարի տևած պետական արգելքից հետո:

Ցյուրիխը դարձավ առաջին շվեյցարական քաղաքը, որը վաթսուներեք տարի անց ընդունեց ավտոսպորտային միջոցառում: Արգելքը սահմանել էր երկրի կառավարությունը դեռևս 1955 թ, երբ ֆրանսիական Լը-Ման քաղաքում կայացած մրցավազքի ընթացքում դժբախտ պատահարի արդյունքում զոհվեց ավելի քան 80 հանդիսատես: Այդ օրվանից սկսած Շվերյցարիայում ոչ մի մակարդակի ավտոմրցում չի անցակցվել: Նույնիսկ Ֆորմուլա 1-ի 1982 թ Շվեյցարիայի Գրան-պրին տեղի ունեցավ ֆրանսիական Դիժոն քաղաքում: Եվ ահա ավտոսպորտը վերադարձավ, և բացառություն արվեց Ֆորմուլա E մրցաշարին, որը աչքի է ըկնում կատարյալ անվտանգությամբ և էկոլոգիական բարձր ցուցանիշներով:

Հետաքրքիր է, որ Լուկաս դի Գրասին նախորդ օրը չկարողացավ նույնիսկ պայքարել «սուպերպոուլի» համար՝ ցույց տալով միայն վեցերորդ արդյունքը: Իսկ լավագույն ցուցանիշը գրանցեց Jaguar Racing-ի բրիտանացի մրցարշավորդ Միչ Էվանսը, ինչը դարձավ երիտասարդ մարզիկի լավագույն ցուցանիշը կարիերայում: Նրան մի փոքր զիջեցին Անդրե Լոթերերը Techeetah-ից, ինչպես նաև Սեմ Բյորդն ու Ժերոմ դ’Ամբրոզիոն, իսկ հինգերորդ հորիզոնականից մեկնարկեց Dragon Racing-ի երկրորդ պիլոտ՝ Խոսե-Մարիա Լոպեսը:  

Մեկնարկին առաջատարները պահպանեցին իրենց դիրքերը, իսկ Լոպեսը նահանջեց 7-րդ տեղ: Միևնույն ժամանակ Նելսոն Պիքե-կրտսերը բախվեց Դանիել Աբտի Audi-ին՝ կոտրելով գերմանացու բոլիդի հետևի հակաթևը: Երրորդ շրջանին դի Գրասին ու Բուեմին հաջորդաբար շրջանցեցին դ’Ամբրոզիոյին: Հետագայում մրցավազքի ընթացքը մի փոքր հանգստացավ, եթե չհաշվենք Էդուարդո Մորտարայի վթարը:  

Իսկ դի Գրասին, որը վերջին չորս մրցափուլերում պարտադիր տեղ էր զբաղեցրել առաջին եռյակում, որոշեց չսպասել պիթ-ստոպերին՝ նախ շրջանցելով Սեմ Բյորդին, իսկ 20-րդ շրջանին երկրորդ տեղի համար պայքարում՝ նաև Անդրե Լոթերերին:  Դրանից մի քանի շրջան անց Ժան-Էրիկ Վերնը բախվեց Ռոզենքվիստին, իսկ դի Գրասին էլ օգտվեց Էվանսի սխալից և ստանձնեց առաջատարի դիրքը: 

Պարզվեց, որ բրազիլացու տեմպը զգալիորեն բարձր է, քան մրցակիցներինը, և նա արագորեն մեծացրեց առավելությունը, ինչին չխանգարեց նույնիսկ անվտանգության FCY ռեժիմը, որը հայտարարվել էր Վերնի և Ռոզենքվիստի բոլիդների վթարից հետո մրցուղում հայտնվաց բեկորները հավաքելու նպատակով:   Ի վերջո դի Գրասին վստահորեն պահպանեց առաջին տեղը, երկրորդը Սեմ Բյորդն էր, իսկ երրորդը՝ Ժերոմ դ’Ամբրոզիոն: Ընթացիկ առաջնության առաջատար Ժան-Էրիկ Վերնը եզրագիծը հատեց միայն 10-րդ տեղում, ինչը թույլ տվեց մրցակիցներին կրճատել տարբերությունը և սրեց պայքարը չեմպիոնության համար:

Շվորյցարիայից Ֆորմուլա E-ն կմեկնի արդեն օվկիանոսից այն կողմ՝ Նյու-Յորք, որտեղ կկայանան առաջնության վերջին երկու Գրան-պրիները: Դրանց մենք կրկին կհետևենք Formula E առաջնության անվադողերի մատակարար՝ Michelin ընկերության Հայաստանյան միակ  ներկայացուցչի՝ «Վիտեսս» ընկերության աջակցությամբ:

ՄՐՑԱՇԱՐՅԻՆ ԱՂՅՈՒՍԱԿ 

1. Ժ-Է.Վերն –                               163 միավոր

2. Ս.Բյորդ –                                  140 միավոր

3. Լ.դի Գրասի –                            101 միավոր

4. Ս.Բուեմի –                                  92 միավոր

5. Ֆ.Ռոզենքվիստ -                        86 միավոր 

1. Techeetah –                                 219 միավոր

2. Audi Sport ABT Shaeffler –       186 միավոր

3. Virgin Racing –                           157 միավոր

4. Mahindra Racing –                      116 միավոր

5. Panasonic Jaguar Racing -           105 միավոր