Իտալական Թուրին քաղաքում կայացավ Car Design Award 2018 ամենամյա մրցանակաբաշխության արարողությունը: Տասներկու ավտոլրագրողներից կազմված ժյուրին հայտարարեց «կոնցեպտ», «սերիական ավտոմեքենա» և «ապրանքանշանի դիզայներական լեզու» անվանակարգերում հաղթած մոդելների անունները: 

Վերջին տարվա ընթացքում ստեղծված կոնցպեպտների մեջ ամենաբարձր գնահատականները ստացավ Honda Urban EV քաղաքային հեչբեքը: Լրագրողները գնահատեցին ճապոնական ապրանքանշանի դիզայներների աշխատանքը՝ ռետրո-մոտիվներն ու ֆուտուրիստական գեղագիտությունը համադրելու համար: 

Քվեարկության արդյունքներով Honda-ին մի փոքր զիջել են Նյու-Յորքի ավտոսրահում ցուցադրված էլեկտրական Genesis Essentia կուպեն և Տոկիոում իր նորամուտը նշած Mazda Vision Coupe կոնցեպտը:

Սերիական ավտոմեքենաների անվանակարգում առավելագույն միավորներ հավաքեց Jaguar E-Pace քրոսովերը: Ժյուրիի անդամները նշեցին. «Այն բազում գծեր է ժառանգել ավելի բարձր դասի մոդելից, սակայն հանդես չի գալիս որպես F-Pace քրոսովերի փոքրացված պատճեն: Այն առանձնանում է սեփական ուժեղ բնավորությամբ:»

Jaguar-ին մի փոքր զիջեց մեկ այլ անգլիական ապրանքանիշ՝ Aston Martin-ը, որը մրցանակ ստացավ Vantage մոդելի համար: Երրորդ տեղն էլ բաժին հասավ Volvo-ին պատկանող  Polestar ապրանքանշանի նոր էլեկտրական կուպեին:

Եվ վերջապես, լավագույն դիզայներական լուծումների համար ժյուրին առանձնացրեց Volvo-ն: Ժյուրին առանձնակի նշեց այն կերպարանափոխումը, որը տեղի է ունեցել վերջին տարիներին, ինչպես նաև նոր մոդելներում սկանդինավյան ավանդական դիզայնի վերաիմաստավորումն ու լուսային սարքավորւմների բացառիկ տեսքը:  

Հիշեցնենք, որ Car Design Award մրցանակը հիմնվել է 1984 թ. իտալական Auto & Design ամսագրի կողմից և հանձնվում էր ամեն տարի մինչև 1997 թ: Որոշ ընդմիջումից հետո այն կրկին վերածնվեց 2016 թ և ներկայումս  միավորում է տասներկու լրագրողների Եվրոպայից, ԱՄՆ-ից, Լատինական Ամերիկայից և Ասիայից:  Անցած տարի բարձրագույն մրցանակներին արժանացան Jaguar I-Pace էլեկտրական կոնցեպտը, սերիական Ford GT սպորտկարը և Land Rover ապրանքանշանը: