BMW ընկերությունը պաշտոնապես ներկայացրեց նոր սերնդի X5 ամենագանցը: Ավտոմեքենայի հանրային ցուցադրությունը կկայանա 2018թ նոյեմբերին: Ինչպես և իր նախորդ տարբերակը, նոր X5-ը կարտադրվի ամերիկյան Սպարտանբերգ քաղաքում: 

Նորույթի գաբարիտային երկարությունը կազմում է 4922 միլիմետր, լայնությունը՝ 2004 միլիմետր, բարձրությունը՝ 1745 միլիմետր, իսկ անվային բազան հավասար է 2975 միլիմետրի: Այսպիսով, ավտոմեքենան 36 մմ ավելի երկար, 66 մմ ավելի լայն և 9 մմ ավելի բարձր է, քան նախորդ սերդնի BMW X5-ը: Սռնիների միջև տարածությունն էլ իր հերթին աճել է 42 մմ-ով: 

Բեռնախցիկի ծավալը 645 լիտր է (հետևի ծալված նստատեղերով՝ 1860 լիտր): Արդեն տարվա վերջին կարելի է որպես օպցիա պատվիրել բացառապես երկու նստատեղից բաղկացած հետևի շարք: Ինչպես և նախորդը, նոր BMW X5-ը աչքի է ընկնում բեռնախցիկի երկփեղկանի դռնով՝ բարձրացող և դեպի ներքև ծալվող հատվածներով: Երկու հատվածն էլ կարող են բացվել և փակվել ավտոմատ եղանակով: 

BMW X5-ը կիսում է իր մոդուլային CLAR հենահարթակը վերջին սերնդի 7-րդ սերիայի սեդանի հետ:  Առանձնակի ուշադրության է արժանի ամենագնացի կախոցային համակարգը: Թե առջևի երկլծակ, թե հետևի բազմալծակ կախոցները համալրված են պնևմատիկ համակարգով (նախորդ սերնդում այն առաջարկվում էր միայն հետևի սռնու համար), որը թույլ է տալիս փոփոխել ավտոմեքենայի լուսածերպը 80 մմ սահմաներում: Դա կարելի է անել կամ սրահում առկա կոճակի, կամ էլ էլեկտրոնային բանալու էկրանի օգնությամբ: Բացի այդ մոդելի համար հասանելի են ամբողջովին կառավարելի շասսին և հետևի ակտիվ կայունացուցիչը:  

Սարքավորումների էլեկտրոնային վահանակն ու ժեստերով կառավարվող նոր մուլտիմեդիա համակարգը (երկուսն էլ՝ 12,3-դյույմանոց էկրանով) հանդիսանում են ստանդարտ համալրման մաս:

Մոդելի համար կառաջարկվի օպցիոնալ M Sport փաթեթը, որը ենթադրում է հետևի դիֆերենցիալի բլոկավորման և առաջին անգամ կիրառվող Off-Road արտաճանապարհային փաթեթի առկայություն: Այն թույլ կտա ընտրել շարժման չորս ռեժիմներից մեկը (ավազ, սայթաքուն քարեր, խճաքար կամ ձյուն), որը փոփոխում է փոխանցումատուփի, լիաքարշ համակարգի, կայունացուցիչների աշխատանքի բնույթն, ինչպես նաև ճանապարհային լուսածերպի մեծությունն ու արձագանքը արագացման ոտնակի աշխատանքին: 

BMW X5-ը հասանելի կլինի նոր 4,4 լիտր ծավալով, 462 ձ.ուժ հզորությամբ բիտուրբո V8 շարժիչով (xDrive50i տարբերակ) և 340 ձ.ուժ հզորությամբ բենզինային V6 շարժիչով (xDrive40i): Դիզելային ագրեգատներից ներկայացված են 249 ձ.ուժ (620 Նմ) շարժիչը xDrive30d մոդիֆիկացիայի համար և  3,0-լիտրանոց 400 ձ.ուժ հզորությամբ (760 Նմ) շարժիչը՝ չորս տուբոմղիչներով (M50d տարբերակ): Բոլոր շարժիչները համակցվում են 8-աստիճան ավտոմատ փոխանցումատուփի հետ:  

BMW X5-ի սարքավորումները կհամալրե նաև պրոյեկցիոն դիսփլեյը, շրջանածիր տեսադաշտի համակարգը, լազերային լուսարձակները, ադապտիվ քրուիզ-կոնտրոլը, տաքացվող և սառեցվող բաժակակալները, ապակյա համայնապատկերային տանիքը, Bowers & Wilkins աուդիոհամակարգն ու կայանմանն օժանդակող առաջադեմ նոր համակարգը:  Վերջինս թույլ է տալիս ավոտմեքենային շարժվել արդեն իսկ անցած հետագծով՝ ինքնուրույն կառավարելով ղեկն ու ապահովելով մինչև 80 մ հետընթաց  շարժում:

Ակնկալվում է, որ Հայասատանում նոր BMW X5-ի վաճառքները կմեկնարկեն 2018թ. նոյեմբերին՝ "Եվրոմոթորս" ընկերության սրահում: