Իրերի Ինտերնետը (Internet Of Things) տարածվում է աշխարհով մեկ՝ կապելով ձեր շրջապատի առարկաները միմյանց և ձեր շարժական սարքավորւմներին: Այս տեխնոլոգիան վաղուց արդեն կիրառվում է առաջատար արտադրողների ավտոմեքենաներում: Այսօր հերթը հասել է նաև անվադողերին: Michelin ընկերությունը պաշտոնապես վաճառքի հանեց Michelin Track Connect համակարգը՝ համապատասխան հավելվածով: 

Michelin Track Connect համակարգը ստեղծված է նախկինում արդեն մրցուղիներում կիրառված տեխնոլոգիայի հիման վրա և թույլ է տալիս հատուկ հավելվածի միջոցով հետևել անվադողերի ճնշմանն ու ջերմաստիճանին: Սա հնարավոր է, եթե դուք օգտվում եք Michelin Pilot Sport Cup 2 անվադողերից, որոնց ներսում տեղադրված են համապատասխան սենսորները, որոնցից տվյալները հաղորդվում են մեքենայի ընդունիչին: Հենց այս ընդունիչից էլ ստացվող տեղեկատվությունը փոխանցում է ձեր սմարթֆոնի Michelin Track Connect հավելվածին:

Հավելավածը ունակ է նաև նախապես խորհուրդներ տրամադրել տվյալ եղանակային կամ ճանապարհային պայմաններին համապատասխան անվադողերի ճնշումը կարգավորելու համար: Ուղևորության ընթացքում՝ իրական ժամանակի ռեժիմում, այն հստակ տեղեկություններ է հաղորդում անվադողերի աշխատանքի մասին: Իսկ հատուկ սանդղակը արտացոլում է ավտոմեքենայի բալանսը՝ կախված անվադողերում ճնշման մակարդակի տատանումներից: 

Այսպիսով Michelin Track Connect համակարգը ոչ միայն հոգ կտանի վարորդի և ավտոմեքենայի անվատնգության մասին, այլև թույլ է տալիս քաղել առավելագույնը ձեր անվադողերից՝ խնայելով զգալի գումարներ: