Ամերիկյան Genovation թյունինգային ընկերությունը Լաս Վեգասում անցկացվող CES2018 սպառողական էլեկտրոնիկայի միջազգային ցուցահանդեսում ներկայացրեց վերջին սերնդի Chevrolet Corvette ավտոմեքենայի հիման վրա կառուցված GXE էլեկտրական սուպերկարը: 

Genovation GXE ավտոմեքենայի ուժային ագրեգատի հզորությունը կազմում է 800 ձ.ուժ՝ ապահովելով 948 Նմ ոլորող մոմենտ: Ավտոմեքենան համալրվում է ավտոմատ փոխանցումատուփով, սակայն կարող է նաև սարքավորվել էլեկտրական ավտոմեքենաների համար բացառիկ լուծում հանդիսացող մեխանիկական տուփով: 

Տեղից մինչև 100 կմ/ժ թափառքը տեղի է ունենում երեք վայրկյանից էլ պակաս ժամանակահատվածում, իսկ ավտոմեքենայի առավելագույն արագությունը կազմում է 354 կմ/ժ: Երկդռնանի սուպերկարի ընթացքի պաշարը երթևեկության ստանդարտ պայմաններում կազմում է 281 կմ: 

Բացի նոր ուժային ագրեգատից Genovation GXE-ն ստացել է նաև թափքի լրամշակման  նոր լուծումներ, ներառյալ ահռելի չափսերի հետևի հակաթևն ու հետևի թափարգելի մեջ ներկառուցված դիֆուզորը: Մոդելն աչքի է ընկնում լուսադիոդային օպտիկայով, Brembo կարբոն-կերամիկական արգելակային սկավառակներով և Harman աուդիոհամակարգով:

Ենթադրվում է, որ Genovation ընկերությունը կթողարկի 75 նման ավտոմեքենա, իսկ դրանցից յուրաքանչյուրը կարժենա շուրջ 750 000 ԱՄՆ դոլար: Առաջին հաճախորդներին մեքենան կտրամադրվի 2018 թ վերջում: