Մինչ աշխարհի կաթոլիկներրն ու բողոքականները նշում են Սուրբ Ծնունդը, բազում կատակների հերոս դարձած բրիտանացի գիտնականները, իսկ ավելի ստույգ բրիտանական Renault Retail Group հոլդինգի մասնագետները հաշվարկել են, թե ինչ ազդեցություն է թողնում Սանթա Քլաուսի գործունեությունը իրենց երկրի շրջակա միջավայրի վրա: 

Այսպես, պարզվեց, որ նվերներ բաժանելու համար Սանթա Քլաուսն ու իր էլֆերը չորս օրվա ընթացքում 1000 նվեր բաժանելու համար պետք է անցնեն շուրջ 1320 կմ, իսկ այդ ընթացքում նրան տեղափոխող եղնիկները արտանետում են 60 կգ CO2 գազին համարժեք մեթան և սպառում են 110 հատ գազար մեկ կիլոմետրի համար, ինչը Մեծ Բրիտանիայի գներով կամզում է 6,7 ֆունտ մեկ կիլոմետրի համար: 

Ավելին, մինչ այդ Սանթա Քլաուսի գլխավոր գրասենյակը, որը գտնվում է Լապլանդիայում, հաշվարկել էր, որ ողջ աշխարհով մեկ նվերներ հասցնելու համար իրենց տրամադրության տակ գտնվող «եղնիկային քարշակով» սահնակները հաղթահարում են շուրջ 196 միլիոն կիլոմետր՝ արտանետելով ավելի քան 40500 տոննա մեթան: Այս պարագայում լուծումը կարող էր լինել միայն մեկը՝ էլեկտրական սահնակ:

Այս բարդ խնդրի լուծումը որոնելիս՝ Սանթան այցելեց Renault-ի ավտոսրահներից մեկը, որտեղ  զարմացած մենեջերը նրան ներկայացրեց ամբողջովին էլեկտրական Renault ZOE ավտոմեքենան: 

Առաջարկն ընդունելով՝ կաթոլիկ Ձմեռ Պապը չորս օրվա ընթացքում հաղթահարեց հազարից ավել կիլոմետր՝ նվերներ հասցնելով ոչ միայն իր ճանապարհորդությանը սոցիալական ցանցերով հետևող մարդկանց, այլև առողջական խնդիրեր ունեցող հարյուրավոր երեխաների:

Էշլի Ուեյդը, Renault Retail Group հոլդինգի թվային մարքեթինգի մենեջերը ակցիայի ավարտից հետո նշեց. «Մենք իսկապես տպավորված ենք այն ընդունելությունից, որին հանդիպեցինք մեր ուղևորության ընթացքում: Այն շատ ծանրաբեռնված էր, մեր էլեկտրական սահնակը նույնիսկ բախվեց մի մոպեդի: Իսկ ամենից կարևոր է այն, որ որպես մարքեթինգային միջոցառում դիտարկվող ակցիան շատ արագ վերածվեց իսկական հրաշքի՝ հիշեցնելով մեզ, թե ինչ է իրականում իրենից ներկայացնում Սուրբ Ծննդի տոնակատարությունը:»