Երեկ արդեն պատմել էինք Mercedes-ի EQA կոնցեպտի մասին, որը մարմնավորում է ընկերության տեսլականը ապագայի մարդատար ավտոմեքենաների վերաբերյալ: Սակայն այսօր արդեն Daimler-ը բացահայտեց նաև մոդելային շարքն էլեկտրանացնելու ծրագրի ևս մեկ կարևոր բաղադրիչ:  Դրա համաձայն Mercedes-Benz-ն էլեկտրական տեխնոլոգիաները կկիրառի բոլոր կոմերցիոն ավտոմեքենաների մեջ և արդեն սկսում է ընդունել ամբողջովին էլեկտրական  eVito բեռնատար վենի պատվերներ:

Մինչ այդ, գնալով ավելի հեռուն, գերմանական ընկերությունն արդեն ներկայացրել էր կոմերցիոն ավտոմեքենաների ապագայի իր պատկերացումներն արտացոլող Vision Van մոդելը, որն իրոք ֆուտուրսիտական տեսք ունի: Սակայն մինչ այդ ավտոմեքենան այս կամ այն կերպ կհասնի սերիական արտադրության, Mercedes-ն արդեն պատրաստ է իր հաճախորդներին մատակարարել 41,4 կՎժ տարողութնակությամբ մարտկոցով և շուրջ 150 կմ ընթացքի պաշարով eVito միջին չափսի վենը: Դրա շարժիչը զարգացնու է 84 կՎ հզորություն և ապահովում է մինչև 120 կմ/ժ արագություն: Առաջին ավտոմեքենաները շուկայում կհայտնվեն արդեն 2018 թ երկրորդ կեսին:

Ֆոլկեր Մորնհինվեգը՝ Mercedes-Benz Vans ստորոբաժանման ղեկավարը, նշում է. «Մենք համոզված ենք, որ կոմերցիոն ավտոմեքենաների էլեկտրականացումը անհրաժեշտություն է, մանավանդ, երբ դրանք աշխատում են քաղաքային պայմաններում: Մեր eDrive@VANs նախաձեռնությամբ մենք ապացուցում ենք, որ միայն ամբողջական լուոծումներն են ունակ այլընտրանք դառնալ մեր կոմերցիոն գործընկերների համար: eVito-ն միայն մեկնարկային կետն է, որին կհետևեն Sprinter-ի նոր սերունդն ու Citan-ը:»

Այսպիսով Daimler-ը ևս մեկ անգամ ցուցադրում է իր վճռականությունը՝ քայլել ժամանակակից տենդենցներին համահունչ և թողարկել արտադրողական և արդյունավետ փոխադրամիջոցներ:

Իսկ ստորև կարող եք ծանոթանալ Vision Van կոնցեպտի մասին պատմող պաշտոնական տեսանյութին: