Ամերիկյան Built Robotics ստարտափը, որի հիմնադիրն է Google-ի նախկին աշխատակից Նոա Ռեդի-Քեմփբելը, առաջին անգամ ներկայացրեց ավտոնոմ կառավարման համակարգով սարքավորված տրակտոր: Այս մեքենայի աշախատանքը ցուցադրվեց հատուկ նկարահանված տեսահոլովակի միջոցով, որը հետզհետե ճանաչում է վայելում համացանցում: Ընկերությունը շուրջ 15 միլիոն դոլարի ներդրումներ է ստացել հետագա զարգացման համար:

Ինչպես հաղորդվում է, տրակտորի ինքնավար աշխատանքն ապահովում է LIDAR օպտիկական հեռաչափի կատարելագործված տարբերակը: Սովորական ավտոմեքենաների վրա տեղադրվող սարքավարումներից այն տարբերվում է նրանով, որ հատուկ նախագծվել է ուժեղ տատանումների և հարվածների պայմաններում աշխատելու նպատակով: 

Տրակտորը ոչ միայն ունակ է ինքնուրույն տեղաշարժվել շինարարական հրապարակում, այլ փորել նախապես սահմանված չափսի փոսորակներ: Աշխատանքի ծավալը գնահատելու համար կիրառվում են հատուկ լազերներ: 

Խելացի տրակտորի ստեղծոցները նշում են, որ դժբախտ պատահարներից խուսափելու համար, համակարգը կարողանում է տարբերակել իր ճանապարհի վրա գտնվող օբյեկտները, այդ թվում նաև մարդկանց: Միևնույն ժամանակ նոր տրակտորի արտադրողականությունը համազոր է մի քանի բանվորից բաղկացած թիմի արտադրողականությանը, իսկ առավելությունների թվում է նաև այն, որ մեքենան կարող է աշխատել առանց հոգնածության և վնասվածքների, այսինքն՝ նաև առանց ընմիջումների: 

Երբ նման տրակտորը կդառնա սերիական և որքան կարժենա շուկայում՝ դեռևս չի հաղորդվում: