Իտալական Lamborghini ընկերությունը ներկայացրել է Urus ամենագնացի հատուկ տարբերակ՝ Graphite Capsule անվանմամբ: Այն առաջարկում է էքստերիերի գունային համադրությունների 16 տարբերակ, ունիկալ օպցիաներ և դեկոր: Urus Graphite Capsule-ի արժեքը  եվրոպական դիլերների մոտ կկակզմի առնվազն 186 134 եվրո:

«Գրաֆիտային» սերիայի ամենագնացների թափքը կունենա չորս փայլատ երանգ: Դրանք են սպիտակ Bianco Monocerus-ը, սև Nero Noctis-ը և գորշի երկու տարբերակ՝ Grigio Nimbus և Grigio Keres. Դրանք լրացվում են թափարգելների, շեմքերի և հետևի սփոյլերի վառ շեշտադրումներով, որոնց համար օգտագործվում են նարնջագույն Arancio Leonis և Arancio Dryope, ինչպես նաև դեղին  Giallo Taurus կամ կանաչ Verde Scandal երանգները:

Graphite Capsule սերիայի ամենագնացները առանձնանում են 23-դյույմանոց Taigete կոնտրաստային անվասկավառակներով և արտանետման խողովակների՝ «մուգ քրոմ» երանգով իրականացված վերդիրներով: Սրահում առատորեն օգտագործված են անոդացված ալյումինից և ածխածնային պլաստիկից պտրաստված տարրեր, իսկ օդափոխվող նստատեղերը լրամշակված են ալկանտարայով: Դրանք հասանելի չեն լինի սովորական Urus-ների համար և առաջարկվում են միայն Graphite Capsule և Pearl Capsule շարքի ամենագնացների համար:  

Տեխնիկական փոփոխություններ նախատեսված չեն:  Urus Graphite Capsule-ը նախկինի պես սարքավորվում է 4.0-լիտրանոց տուրբոշարժիչով, որը զարգացնում է 650 ձ.ուժ հզորություն և 850 Նմ ոլորող մոմենտ: Ագրեգատը համակցվում է  8-աստիճան ավտոմատ փոխանցումատուփի հետ, իսկ լիաքարշ համակարգը աշխատում է ինքնաբլոկավորվող Torsen դիֆերենցիալի հիման վրա: