Չինական Hongqi պրեմիալ ապրանքանշանը, որը հանդիսանում է FAW Group կոնցերնի մաս, որոշել է թողարկել S9 կոնցեպտի 70 սերիական օրինակ: Մոդելը շուկա կհանվի 10 միլիոն յուան (մոտ 1,45 միլիոն դոլար) արժեքով, ինչը դարձնում է այն երբևէ ստեղծված ամենաթանկ չինական ավտոմեքենան: 

Hongqi S9 կուպեն առաջին անգամ ցուցադրվեց 2019 թվականին Ֆրանկֆուրտի ավտոսրահում՝ որպես կոնցեպտ: Հիբրիդային այս մոդելի արտաքին պանելները պատրաստված են ածխածնային պլաստիկից, իսկ շասսին՝ կոմպոզիտային այլ նյութերից: Մոդելը սարքավորվում է 4,0-լիտրանոց V8 բենզինային շարժիչով, որը զուգակցվում է արտադրողական էլեկտրական շարժչով: Ուժային ագրեգատի ընդհանուր հզորությունը կազմում է մոտ 1400 ձ.ուժ, ինչև թույլ է տալիս S9-ին 0-ից 100 կմ/ժ արագությունը զարգացնել 1,9 վայրկյանում: Այս ցուցանիշը համեմատական է, օրինակ, Aspark Owl ճապոնական էլեկտրական հիպերկարի դինամիկայի հետ:  Hongqi S9-ի առավելագույն արագությունը 400 կմ/ժ է: 

Ակնկալվում է, որ ավտոմեքենայի արտադրությամբ կզբաղվի Silk EV ստարտափը, որը գրանցված է Շանհայի ազատ տնտեսական գոտում: Այս տարվա ապրիլին հայտնի դարձավ, որ ընկերությունը պայմանագիր է ստորագրել FAW Group-ի հետ՝ ստանձնելով S-Series սպորտային մոդելների հետագա արտադրության պատասխանատվությունը: Իր կողմից Silk EV-ն նախագծի մեջ կներդնի մոտ 10 միլիարդ յուան (մոտ 1,5 մլրդ դոլար): Համատեղ արտադրությունը կիրականացվի Չանչուն քաղաքում և կմեկնարկի արդեն 2021 թվականին: