Լեհական Carlex Design թյունինգային աթելիեն ներկայացրել է Ford Ranger պիքապի բացառիկ մոդիֆիկացիա: Փոփոխության են ենթարկվել ինչպես մոդելի արտաքինը, այդպես էլ սրահը:  Նախագծի հիմքում ընկած է չորրորդ սերնդի մոդելը, որը ներկվել  է հատուկ սև գույնով, ավելացնելով աթելիեյի տարբերանշանները: 

Ավտոմեքենան ստացել է ռադիատորի նոր ճաղավանդակ, նոր թափարգել և կարտերի պաշտպանիչ: Պիքապը սարքավորվել է նաև անվակամարների ընդլայնիչներով և արտաճանապարհային անիվներով: Ամբողջովին կարգավորվող կախոցը ապահովում է անցունակության որակները: Բացի այդ տեղադրվել են ֆարկոպ և կլոր կտրվածքով խողովակներից պատրաստված ոտնահենակներ: 

Փոփոխության է ենթարկվել նաև ամենագնացի սրահը: Երկարացված ստորին հատվածով նստատեղերը ստացել են ամբողջովին նոր լրամշակում՝ տեքստուրային գործվածքով և արծաթագույն դարձակարերով: Մոդիֆիկացիայի արժեքը չի բացահայտվում, իսկ Carlex Design-ում շեշտում են, որ ոճային Ranger-ով տեղաշարժվելը հարմարավետ կլինի թե վարորդի, թե ուղևորների համար: