Ամեն տարի ավտոմոբիլային ոլորտի առաջատար կազմակերպությունների մի քանի տասնյակ (այս տարի դրանք 86 էին) հեղինակավոր մասնագետներ ընտրում են տարվա լավագույն ավտոմեքենաները մի քանի անվանակարգերում: Հաղթողների անունները հայտարարվում են շքեղ արարողության ընթացքում, որին սովորաբար մասնակցում են հազարավոր հյուրեր: Այս տարի առաջին անգամ հաղթողների անունները հայտարարվեցին համացանցում: 

2020 թվականին ժյուրին ավտոմեքենաներ էր ընտրում հինգ տարբեր անվանակարգերում, որոնցից ավանդաբար առավել կարևոր է համարվում «Տարվա լավագույն ավտոմեքենա» անվանակարգը: Այս տարի այդ պատվավոր մրցանակը բաժին հասավ Kia Telluride ամենագնացին, որը տպավորել էր քվեարկողներին իր դիզայնի և նորագույն տեխնոլոգիաների մտածված համադրությամբ: 

Անցած տարի ներկայցված ամբողջովին էլեկտրական Porsche Taycan մոդելը լավագույնը ճանաչվեց միանգամից երկու անվանակարգում: Գերմանական ավտոմոբիլաշինության նորագույն նվաճումը ստացավ «Լավագույն սպորտային ավտոմեքենա» և «Լավագույն շքեղ ավտոմեքենա» մրցանակները՝ առաջ անցնելով այնպիսի մրցակիցներից, ինչպիսին են Mercedes-Benz EQC-ն և իր «արյունակից» Porsche 911 և Porsche 718 Spyder/Cayman GT4 մոդելները:

«Լավագույն քաղաքային ավտոմեքենա» անվանակարգում իրեն հավասարը չուներ հարավկորեական մեկ այլ մոդել՝ էլեկտրական Kia Soul EV-ն: Բավական սուր պայքարում այն իրենից հետ թողեց Mini Electric և Volkswagen T-Cross մոդելներին: Ինչպես և ակնակլվում էր քաղաքային պայմաններում շահագործման տեսանկյունից առավելությունը տրվեց հենց էլեկտրական ավտոմեքենաներին:

Եվ վերջապես հինգերորդ անվանակարգում, այն է՝ «Տարվա լավագույն դիզայն», հաղթանակը շնորհվեց նոր սերնդի Mazda3 հեչբեքին: Ժյուրիի կարծիքով այն ավելի արժանի էր այդ մրցանակին, քան համապատասխանաբար երկրորդ և երրորդ տեղերը զբաղեցրած Peugeot 208-ը և արդեն իսկ հիշատակված Porsche Taycan-ը: