Գերմանական թյունինգային Hofele-Design աթելիեն ներկայացրել է Maybach-ի ոճով ձևավորված  Mercedes-AMG E 53 Cabriolet ավտոմեքենան: Մոդելը պատրաստված է մեկ օրինակով և վաճառվում է 168 929 եվրոյով, ինչը հավասար է S 600 սեդանի գնին:

Mercedes-AMG E 53 Cabriolet by Hofele մոդելը կարելի է ճանաչել Royal Peacock Blue մետալիկ կապույտ գույնի թափքով, թափարգելների սև սնդուսափալ ներդիրներով, ռադիատորի ուղղաձիգ ճաղավանդակով, կողային հատվածների դեկորատիվ տարրերով և քրոմապատ շեշտադրումներով: Կաբրիոլետը սարքավորված է 21-դյույմանոց Turbine հղկված անվասկավառակներով, որոնք առանձնանում են փայլատ արծաթագույն լրամշակմամբ:  

Ավտոմեքենայի սրահը ամբողջությամբ պաստառապատված է բեժ Magnolia և կապույտ Royal Blue երանգի նապպա կաշվով:  Բոլոր աշխատանքները կատարված են ձեռքով, բացառությամբ դեկորատիվ դարձակարերի և եզրակավորման, որոնք վստահվել են համակարգչային կառավարմամբ գերճշգրիտ հաստոցներին: Կաշի է օգտագործված նաև բոլոր պլաստիկ վահանակների և նույնիսկ շարժական տանիքը ձևավորելու համար: Mercedes-AMG E 53 Cabriolet-ի հատակը ծածկված է ոչխարի բրդից գործված եզակի գորգերով: