Գերմանական Daimler ընկերությունը տվայլներ է հրապարակել Mercedes-AMG ընտանիքի «ամենակրտսեր» անդամի՝ A 35 4Matic հեչբեքի մասին: Մոդելը ստացել է նոր տուրբոշարժիչ և առանձնանում է կախոցի հատուկ կարգավորումներով: 

Mercedes-AMG A 35 4Matic-ն աչքի է ընկնում թափքի ուժեղացված առաջնամասով, ինչը նաև բարելավել է հեչբեքի կառավարելիությունը շրջադարձերում և ապահովել է  անիվների բացվածքի կայունությունը նույնիսկ բարձր արագությունների պայմաններում:

Որպես ուժային ագրեգատի հիմք է ընդունվել սովորական A-դասի երկլիտրանոց M260 քառագլան շարժիչը, որը լրացուցիչ սարքավորվել է ձուլած ալյումինից պատրաստված թեթև կարտերով, տուրբոմղիչով, գազաբաշխման ֆազերի փոփոխման համակարգով, պիեզոէլեկտրական բոցամուղերով և բազմակայծ այրման  համակարգով:

Այս ամենից հետո շարժիչի հզորությունը հասցվել է 306 ձիաուժի, որն ապահովում է 400 Նմ ոլորող մոմենտ: Որպես փոխանցումատուփ օգտագործվում է 7-աստիճան ռոբոտացված մեխանիզմը, որը սարքավորված է լոնչ-կոնտրոլ ֆունկցիայով և ենթաղեկային թերթիկների օգնությամբ փոխարկման ֆունկցիայով:  0-ից 100 կմ/ժ արագոթյունը A 35-ը զարգացնում է 4,7 վայրկյանում:

Այս հոթ-հեչը սարքավորված է նաև առաջադեմ լիաքարշ համակարգով, որի էլեկտրամեխանիկական կցորդիչը բաշխում է ոլորող մոմենտը՝ կախված լայնակի և երկայնակի արագացումից, ինչպես նաև արագությունից, ոտնակի դիրքից և ընտրված փոխանցումից: 

 

Mercedes-AMG A 35 4Matic-ը սարքավորված է շարժման ռեժիմների ընտրության համակարգով՝ 4 նախապես սահմանված պրոֆիլներով և փոխանցումատուփի, շարժիչի և լիաքարշ համակարգի աշխատանքի անհատական կարգավորման հնարավորությամբ: Առաջարկվում է նաև քարշուժի կառավարումն իմիտացնող համակարգ, որն անհրաժեշտության դեպքում թեթևակի արգելակում է շրջադարձի նկատմամաբ ներքին հետևի անիվը:

Մոդելի համար հասանելի են ադապտիվ էլեկտրակառավարվող մեղմիչները, 350մմ (առջևի) և 330 մմ (հետևի) տրամագծով ծակոտկեն սկավառակներով և քառաբլոկ ենթակիրներով արգելակային համակարգը, ղեկի էլեկտրամեխանիկական ուժեղացուցիչը և էլեկտրակառավարվող փականակներով արտանետման համակարգը: 

Mercedes-AMG A 35 4Matic-ի սրահում կենտրոնական տեղ են զբաղեցնում  MBUX մուլտիմեդիա համակարգն ու սարքավորումների թվային վահանակը՝ հատուկ AMG-ձևավորմամբ: Ուշադրության են արժանի նաև սենսորային կոճակներով ղեկը, որը նման է առաջատար S-դասում առաջարկվող տարբերակին, և սպորտային նստատեղերը:  Որպես օպցիա կարելի է պատվիրել վիրտուալ մրցարշավային օգնական AMG Track Pace ծրագիրը, որը ունակ է գրանցել ավտոմեքենայի մինչև 80 հարաչափ՝ դրանք հետագայում օգտագործելու նպատակով: 

Ինչպես արդեն նշել ենք Mercedes-AMG A 35 4Matic մոդելի հանրային նորամուտը կկայանա Փարիզում: Նախնական պատվերները կընդունվեն արդեն հոկտեմբերից, իսկ առաջին մոդելները կհասցվեն գնորդներին 2019 հունվարին: