Ճապոնական Honda ընկերությունը ներկայացրել է Civic ընտանիքի թարմացումները: Փոփոխությունները հիմնականում առնչվում են արտաքին տեսքին, ինչպես նաև ընդլայնվել է համալրումների ցանկը, իսկ սեդանի ու կուպեի համար առաջարկվում է նաև Sport մոդիֆիկացիան, որը մինչ այդ հասանելի էր միայն հեչբեքի վարորդներին:  

Նախորդ տարբերակից նորույթը առանձնանում է վերափոխված թափարգելներով, ռադիատորի նոր վանդակաճաղով (սև՝ քրոմապատի փոխարեն), առջևի լուսարձակների ավելի ժամանակակից տեսքով, անվասկավառակների նոր դիզայնով և թափքի հետնամասում ավելացած քրոմապատ տարրերով: 

Արդեն իսկ հիշատակված Sport մոդիֆիկացիան սարքավորվում է ավելի ագրեսիվ թափարգելով, կենտրոնով տեղադրված արտանետման խողովակով, բեռնավորման բաժանմունքի դռան սփոյլերով (սեդան տարբերակում) և 18-դյույմանոց անվասկավառակնրով: Այս ավտոմեքենաները համալրվելու են 158 ձ.ուժ հզորությամբ 2.0-լիտրանոց մթնոլորտային շարժիչով, որը կարող է աշխատել թե վեցաստիճան մեխանիկական, թե վարիատորային փոխանցումատուփի հետ: 

Ի լրումն վերը նշված նորամուծությունների ավտոմեքենան կսարքավորվի նաև Honda Sensing անվտանգության համակարգերի համալիրով: Այն ներառում է ադապտիվ քրուիզ-կոնտրոլը, ճակատային բախումների մասին նախազգուշացնող համակարգը և շարժման շարքի պահպանման ֆունկցիան:  Բացի այդ որպես օպցիա կառաջարկվի կատարելագործված մուլտիմեդիա համակարգը՝ 7-դյույմանոց էկրանով: