Brabus թյունինգային աթելյեն ներկայացրել է Smart ForTwo Cabrio ավտոմեքենայի նոր տարբերակը՝ 125R անվանմամբ: 

Մեքենայի առանձնահատկություններից են 30 մմ ավելի ցածր կախոցը, առջևի և հետևի տարաչափ անիվները, ինչպես նաև Ferrari 458 Italia մոդելի ոճով իրականացված արտանետման համակարգը: Նախատեսվում է թողարկել ընդամենը 125 հատ նմանատիպ Smart ավտոմեքենա՝ 39 900 եվրո արժողությամբ:

«Լիցքավորված» Brabus 125R-ը սարքավորվում է 0,9-լիտրանոց եռագլան տուրբոշարժիչով, որի հզորությունը կազմում է 125 ձ.ուժ, իսկ ոլորող մոմենտը՝ 200 Նմ: Համեմատության համար նշենք, որ սովորական Smart ForTwo Cabrio-ի շարժիչի տվյալները համապատասխանաբար կազմում են 109 ձ.ուժ և 170 Նմ: 0-ից 100 կմ/ժ թափառքի համար 125R-ից կպահանջվի 9,2 վայրկյան, իսկ ավտոմեքենայի առավելագույն արագությունը կազմում է 175 կմ/ժ:  

Բացի նոր շարժիչից և արտանետման համակարգից Brabus 125R-ը սարքավորվում է կաշվով լրամշակված սպորտային նստատեղերով, ոտնակների ալյումինե վերդիրներով, փոխանցումների ենթաղեկային անոդացված փոխարկիչներով և կայանման արգելակի նոր լծակով:  

Հիշեցնենք, որ անցած տարի իր գործունեության 40-ամյակի կապակցությամբ Brabus-ը ներկայացրեց Ultimate E կոնցեպտը, որը նույնպես կառուցված էր Smart ForTwo մոդելի հիման վրա: 

Այն սարքավորված էր  204 ձ.ուժ հզորությամբ էլեկտրական շարժիչով (350 Նմ ոլորող մոմենտ) և 22 կՎտժ տարողունակությամբ մարտկոցների բլոկով: Brabus Ultimate E-ն ունակ է արագանալ մինչև 100 կմ/ժ ընդմանեը 4.5 վայրկյանում՝ գրանցելով 180 կմ/ժ առավելագույն արագություն: