Գերմանական Volkswagen ընկերությունը ներկայացրեց Grand California անվանումն ստացած երկհարկանի շարժական տունը, որը կառուցված է Crafter  մոդելի հիման վրա: Նորույթը հանրությանը հասանելի դարձավ Դյուսելդորֆում ընթացող մասնագիտացված ցուցահանդեսի ժամանակ:  

Մեքենայի գաբարիտային երկարությունը կազմում է վեց մետր, իսկ անվային բազան՝ 3,6 մետր է: Խցիկի բարձրությունը հասնում է 2,2 մետրի: Մինչև 180 աստիճանով պտտվող առջևի նստատեղերի հետևում գտնվում է «ճաշասենյակային» գոտին՝ հարմարավետ սեղանով: 

Ավելի խորքում է տեղակայված հիգիենայի սենյակը՝ մեկ քառակուսի մետր մակերեսով: Այն ներառում է զուգարանը, ցնցուղն ու ծալվող լվացամանը: Լույսը վառվում և հանգում է ավտոմատ եղանակով՝ շարժման ցուցիչների շնորհիվ: Ուղևորները հնարավարություն ունեն կարգավորել ցնցուղի ջերմաստիճանն, իսկ ջրի բաքի ծավալը կազմում է 110 լ: 

Խոհանոցային հատվածում են գտնվում սալօջախը՝ երկու այրոցներով ու ևս մեկ լվացաման: Այստեղ կգտնեք նաև զանազան պահոցներ և պահարաններ, ինչպես նաև 70 լ ծավալով սառնարան: 

Եվ վերջապես, ավտոմեքենայի հետնամասում է տեղադրված մեծ մահճակալը: Որպես օպցիա հնարավոր է պատվիրել նաև «երկրորդ հարկ», որտեղ կարելի կլինի տեղադրել մի քանի քնատեղ երեխաների համար: Այս դեպքում ավտոմեքենայի բարձրությունը կհասնի համարյա երեք մետրի:  

Օպցիաների ցանկը ներառում է նաև ջեռուցման լրացուցիչ համակարգեր, հեծանիվների ամրաններ և ակտիվ ընտանեկան հանգստի ու քեմփինգի համար նախատեսված այլ հարմարանքներ ու սարքավորումներ: