ԱվտոՎԱԶ-ը ներկայացրել է Vesta ընտանիքի ամենահզոր տարբերակը՝ Sport անվանմամբ: Սովորական մոդելից նորույթը տարբերվում է առջևի օրիգինալ թափարգելով, հետևի սփոյլերով և 16 մմ-ով ավելի ցածր կախոցով (ճանապարհային լուսածերպը նվազեցվել է մինչև 162 միլիմետրի): Lada Vesta Sport-ի նորամուտը կկայանա օգոստոսի վերջին՝ Մոսկվայի միջազգային ավտոսսրահում:

Բացի նոր թափարգելից և սփոյլերից Lada Vesta Sport-ը ստացել է ավելի հզոր անվակամարներ, հետևի թափարգելի ոճավորված դիֆուզոր, ինչպես նաև արտանետման երկատված  խողովակ, շեմքերի աերոդինամիկ վերդիրներ և 17-դյույմանոց անվասկավառակներ՝ ցածրապրոֆիլ անվադողերով:

Կառավարելիությունը բարելավվելու նպատակով կատարելագործվել է ավտոմեքենայի շասսին: Մասնավորապես տեղադրվել են մեղմիչների հատուկ կանգնակներ՝ մեղման առանձնահատուկ չափաբերումներով, ինչպես նաև ավելի ուժեղ շրջապտուտային բռունցք:  Այս ամենով հանդերձ սպորտային Vesta-ն համալրվում է ավելի մեծ տրամաչափի արգելակային սկավառակներով: 

Lada Vesta Sport-ի կապոտի տակ կտեղադրվի 1,8-լիտրանոց շարժիչ, որի հզորությունը ենթադրաբար կմեծացվի մինչև 145 ձ.ուժ (187 Նմ ոլորող մոմենտ): Ագրեգատը կստանա նոր բաշխիչ լիսեռներ, գազաբաշխման ֆազերի կարգավորման վերամշակված համակարգ և արտաթողման փոփոխված համակարգ: Շարժիչը կհամադրվի 5-աստիճան մեխանիկական փոխանցումատուփի հետ: Նախնական տեղեկությունների համաձայն, 0-ից մինչև 100 կմ/ժ արագությունը նոր Vesta-ն  կզարգացնի 9,6 վայրկյանում: