Ֆորմուլա E առաջնության բերլինյան փուլն անցավ հիանալի արևոտ եղանակային պայմաններում, ինչը նպաստեց նաև, որ հին Թեմպլհոֆ ավտոմրցուղու տրիբունաները գրեթե լեփ-լեցուն էին: Եվ գերմանացի երկրպագուները հիասթափված չմնացին. Audi-ն հիանալի նվեր մատուցեց իր հավատարիմ հետևորդներին:

Փոուլից մեկնարկած Դանիել Աբտը պահպանեց իր առաջատարի դիրքը, մինչ դեռ Mahindra-ն ներկայացնող Ֆելիքս Ռոզենքվիստը իրենից առաջ թողեց մի քանի մրցակցի, այդ թվում Օլիվեր Թյորվիին, Ժերոմ դ՛Ամբրոզիոյին և Ժան-Էրիկ Վերնին: Այս մրցարշավորդների պայքարին շուտով միացան նաև Լուկաս դի Գրասին և Սեբասթիան Բուեմին, որոնք փորձեցին պայքար պարտադրել առաջատարներին: 

Այս մարտավարությունն իր արդյունքները տվեց 10-րդ շրջանին, երբ դի Գրասին գեղեցիկ հնարքով վազանցեց Վերնին, ինչից հետո նույնը կարողացավ անել նաև Բուեմին: Այս ամենի արդյունքում ընդհանուր հաշվարկի առաջատար Վերնը հայտնվեց միայն 5-րդ հորիզոնականում: Երևում էր, որ ֆրանսիացու ավտոմեքենան լուրջ տեխնիկական խնդիրների է բախվել, չնայած Վերնը չէր հանձնվում: Դիմանալաով շուրջ տասը շրջան՝ նա հանդուգն գրոհ ձեռնարկեց և չնայած բոլիդների թեթև բախումին կարողացավ վերադարձնել մեկ հորիզոնական:

Պիթ-ստոպերի ալիքի ավարտից հետո Դանիել Աբտը պահպանեց առաջատարի դիրքը, իսկ երկրորդ տեղում հայտնվեց նրա թիմակիցը՝ Լուկաս դի Գրասին: Բուեմիի և Վերնի պայքարը սրվեց նոր ուժով, քանի որ Renault e.dams-ի շվեյցարացի մրացարշավորդը կրկին առաջ անցավ ֆրասնիացուց և երկուսն ել շարունակեցին հետապնդել Օլիվեր Թյորվիին: 34-րդ շրջանին, օգտվելով այն հանգամանքից, որ Բուեմին գրոհեց Թյորվիին, Վերնն իր հերթին հիանալի մանևրով կարողցավ առաջ անցնել թե բրիտանացուց, թե շվեյցարարացուց՝ դուրս գալով երրորդ հորիզոնական:

Այս պայքարին իրենց հետին տեսադաշտի հայելիների մեջ հետևում էին Audi-ի երկու մրցարշավորդները: Կարելի է եզրակացնել, որ թիմի ղեկավարությունն այնուամենայնիվ կիրառեց թիմային մարտավարություն՝ թույլ չտալով իր երկու պիլոտներին պայքարել մրցուղում և ձգտելով պահպանել հաղթական դիրքերը: Արդյունքում Audi-ն գրանցեց իր առաջին պատմական դուբլը, իսկ Ժան-Էրիկ Վերնը կարղացավ պահպանել երրորդ տեղը, ինչի հաշվին էլ ավելի ամրապնդեց իր առաջատարի դիրքը առաջնության անհատական հաշվարկում: 

Իսկ Ֆորմուլա E-ի հաջորդ փուլը կկայանա Շվեյցարիայում: Դա կլինի Ցյուրիխի Գրան-պրին, որին մենք կհետևենք Formula E առաջնության անվադողերի մատակարար՝ Michelin ընկերության Հայաստանյան միակ  ներկայացուցչի՝ «Վիտեսս» ընկերության աջակցությամբ:

ՄՐՑԱՇԱՐՅԻՆ ԱՂՅՈՒՍԱԿԸ 

Անհատական հաշվարկ

1. Ժ-Է.Վերն –                              162 միավոր

2. Ս.Բյորդ –                                 122 միավոր

3. Ֆ.Ռոզենքվիստ –                      86 միավոր

4. Դ.Աբտ -                                     85 միավոր 

5. Ս.Բուեմի –                                82 միավոր

Թիմային հաշվարկ

1. Techeetah –                                205 միավոր

2. Audi Sport ABT Shaeffler –      161 միավոր

3. Virgin Racing –                          139 միավոր

4. Mahindra Racing –                    108 միավոր

5. Panasonic Jaguar Racing -           96 միավոր