Եվրոպական հանձնաժողովի որոշման համաձայն մինչև 2021 թվականը բոլոր ավտոմեքենաների ստանդարտ համալրումը պետք է ներառի անվտանգության  11 էլեկտրոնային համակարգ: Դրանց թվում են ավտոմատ վթարային արգելակման և երթևեկության շարքի պահպանման  համակարգերը, հետին տեսադաշտի տեսախցիկը, ինչպես նաև վարորդի հոգնածության աստիճանի վերահսկման ֆունկցիան: Այս ամենը կարվի Vision Zero նախագծի շրջանակներում, որի նպատակն է մինչև 2050 թ զրոյի հասցնել ճանապարհատրասնպորտային պատահարների արդյունքում գրանցվող մահերի թիվը: 

  

Հանձնաժողովն առաջարկում է եվրոպական շուկայի համար նախատեսված բոլոր մոդելները բացի նշված համակարգերից սարքավորոել նաև արագության ինտելեկտուալ սահմանափակիչով: Վերջինս աշխատում է ճանապարհային նշանների ճանաչման ֆունկցիայի հետ համատեղ՝ ավտոմատ եղանակով սահմանափակելով մեքենայի արագությունը գործող կարգադրություններին համապատասխան:  Պարտադիր կլինեն նաև «ալկոհոլային փականը», տելեմատիկ տվյալների հավաքագրման և պահպանման համակարգերը, անվտանգության կատարելագործված ամրագոտիները և հետիոտների պաշտպանության մի շարք լուծումներ:  

Մասնագետների հաշվարկով անվտանգության նշված 11 համակարգերի պարտադիր տեղադրումը թույլ կտա մոտակա 10 տարիների ընթացքում պահպանել 7 300 մարդու կայնք և կանխել 38 900 լուչջ վնասվածք:  

Հիշեցնենք, որ այս տարվա մայիսի մեկից ԱՄՆ-ում պարտադիր են դարձել հետին տեսադաշտի տեսախցիկները և քննարկվում է նաև պարտադիր լուծումների ցանկն ընդլայնել ավտոմատ վթարային արգելակման համակարգերով, կույր գոտիների վերահսկման, ինչպես նաև երթևեկության շարքից շեղվելու մասին նախազգուշացման ֆունկցիաներով: