Մայիսի 13-ին Իսպանիայում կայացավ 2018 թ. Ֆորմուլա 1 առաջնության հինգերորդ մրցափուլը, որը սովորաբար թույլ է տալիս գնահատել թիմերի ուժերի հարաբերակցությունը մինչև ամառային արձակուրդն ընկած ժամանակահատվածում: Ինչպես և նախորդ մրցափուլերում հիմնական պայքարը ծավալվեց Mercedes-ի և Ferrari-ի միջև, որից հաղթող դուրս եկան Շտուտգարտի ներկայցուցիչները:

Թիմերը վերադարձան Բարսելոնա մի քանի ամիս ընդմիջումից հետո: Միջսեզոնային թեստերը, որոնք անցան գրեթե էքստրեմալ պայմաններում՝ ձնապատ մրցուղու վրա, ապացուցեցին, որ այս մրցափուլի արդյունքը մշտապես կախված է անվադողերի աշխատանքից, ինչը մեկ անգամ ևս ապացուցվեց պաշտոնական մրցափուլի ընթացքում: 

Ուրբաթ և շաբաթ օրերին կայացած մարզումների ժամանակ Mercedes-ի պիլոտները բարձրաձայնեցին իրենց հավակնությունների մասին, իսկ որակավորման փուլում գրավեցին մեկնարկային վանդակաճաղի առաջին շարքը, ընդ որում Լյուիս Հեմիլթոնը նվաճեց երկրորդ փոուլն անընդմեջ: Երկրորդ շարքը ամբողջությամբ բաժին հասավ Ferrari-ի մրցարշավորդներին, իսկ երրորդն էլ ՝ Red Bull Racing-ին:

Մրցավազքի մեկնարկին Հեմիլթոնը պահպանեց առաջատարի դիրքը, իսկ ահա Ֆեթելին հաջողվեց շրջանցել Վալթերի Բոթասին: Ինչպես հաճախ է տեղի ունենում Բարսելոնայում, արդեն առաջին իսկ շրջանին պելոտոնի խորքում տեղի ունեցան բախումներ: Ալոնսոն չկիսեց ճանապարհը Սայնսի հետ, Մագնուսենի և Գրոժանի պայքարում ֆրասնիացու ավտոմեքենան տեղապտույտ կատարեց և վառվող անվադողերից դուրս եկող ծխի մեջ հայտնվեց հետագծի վրա, ինչի հետևանքով Haas-ին բախվեցին Հյուլկենբերգն ու Գասլին: Բնականաբար, երեքն էլ դուրս մնացին պայքարից, իսկ մրցուղում հայտնվեց անվտանգության ավտոմեքենան:

Մրցավազքը վերսկսվեց վեցերորդ շրջանին, և Հեմիլթոնը կրկին հնարավորություն չտվեց մրցակիցներին իրենից առաջ անցնել: Պիլոտները մտան տակտիկական պայքարի մեջ, որտեղ կարևոր էին կատարվելիք պիթ-ստոպների պահն ու տևողությունը: Քսանհինգերորդ շրջանին շարժիչի անսարքության հետևանքով պայքարից դուրս մնաց Կիմի Ռայկկոնենը՝ զրկելով Ferrarի-ին զգալի քանակությամբ միավորներից: Մոտ տասը շրջան անց նույն ճակատագրին արժանացավ Էսթեբան Օկոնի Force India-ն, սակայն պիլոտը չկարողացավ հեռացնել բոլիդը  մրցուղուց, ինչի պատճառով կազմակերպիչները կրկին ստիպված եղան բաց թողնել անվտանգության մեքենան:

Մրցավազքի վերսկսելուց հետո առավել ուշագրավ դրվագը Ստոֆել Վանդորնի վարած McLaren-ի խափանումն էր: Ի դեպ սա այս տարի անցկացրած բոլոր մրցափուլերի ընթացքում առաջին դեպքն էր, երբ բրիտանական թիմի բոլիդը դուրս է մնում պայքարից, ինչը չտեսնված հաջողություն կարելի է համարել՝ նախորդ տարիների տառապանքների հետ  համեմատ: Իսկ պելոտոնի գլխամասում գրեթե պայքար տեղի չունեցավ: Երկու Mercedes-ները առանց լուրջ դիմադրության եզրագիծը հատեցին ճիշտ այն հերթականությամբ, որով մեկնարկել էին: Մրցանակային երրորդ տեղը բաժին ընկավ Մաքս Ֆերսթապենին, որը պիթ-ստոպի ժամանակ կարողացավ շրջանցել Սեբասթիան Ֆեթելի Ferrari-ն: Բացի այս չորս պիլոտներից միավորներ վաստակեցին նաև Դանիել Ռիկիարդոն, Քևին Մագնուսենը, Կարլոս Սայնսը, Ֆերնանդո Ալոնսոն, Սերխիո Պերեսը և Շարլ Լեկլերը:

Առաջնության հաջորդ փուլը՝ Մոնակոյի Գրան-պրին, տեղի կունենա երկու շաբաթ անց, իսկ կայացած հինգ փուլից հետո մրցաշարային աղյուսակներն ունեն հետևյալ տեսքը:

1. Լյուիս Հեմիլթոն, Mercedes –                95 միավոր

2. Սեբասթիան Ֆեթել, Ferrari –               78 միավոր

3. Վալթերի Բոթաս, Mercedes –               58 միավոր

4. Կիմի Ռայկկոնեն, Ferrari –                   48 միավոր

5. Դանիել Ռիկիարդո, Red Bull –            47 միավոր

1. Mercedes AMG Petronas Motorsport-   153 միավոր

2. Scuderia Ferrari –                                   126 միավոր

3. Aston Martin Red Bull Racing –              80 միավոր

4. Renault Sport Formula 1 Team –              41 միավոր

5. McLaren F1 Team –                                  40 միավոր