Ապրիլի 14-ին կայացավ Ֆորմուլա E առաջնության 2017-2018 թթ մրցաշրջանի հերթական մրցափուլը, որն առաջին անգամ պատմության մեջ անցկացվեց Հռոմի փողոցներում: Հրաշալի եղանակը, պատմական տեսարանները, բարձր տեխնոլոգիաներն ու անզիջում պայքարը հաճույք պատճառեցին թե մասնակիցներին, թե հանդիսատեսին:

Մինչև հիմնական մրցավազքը կայացած որակավորման փուլում մեկնարկային վանդկաաճաղում առաջին դիրքը զբաղեցրեց Mahindra-ն ներկայացնող Ֆելիքս Ռոզենքվիստը, ով կարողացավ շրջանցել Սեմ Բյորդին Virgin Racing-ից և Միչ Էվանսին Jaguar Racing-ից: Մեկնարկին շվեդացի մրցարշավորդը պահպանեց առաջատարի դիրքը՝ չնայած Բյորդի՝ մրցակցին շրջանցելու համառ փորձերին: 

Իրավիճակը պահպանվեց նաև պիթստոպերից հետո, երբ մրցարշավորդները փոխեցին իրենց բոլիդները ամբողջովին լիցքավորված նոր մեքենաներով: Միայն եզրագծից տասը շրջան առաջ Ռոզենքվիստն ինքը սխալվեց՝ հարվածելով սահմանափակիչ կառուցվածքներից մեկին և լրջորեն վնասելով մեքենան, ինչի շնորհիվ Բյորդը գլխավորեց մրցավազքը: 

Բրիտանացու հիմնական հետապնդողը Միչ Էվանսն էր, որը սակայն 29-րդ շրջանին ևս կանգնեց խնդիրների առաջ և իրենից առաջ բաց թողեց Լուկաս դի Գրասիին: Թվում էր, թե էվանսին կհաջողվի այնուամենայնիվ մրցանակային տեղ գրավել, բայց վերջին շրջանին նրա բոլիդը ամբողջովին լիցքաթափվեց, ինչի հետևանքով նորզելանդացու Jaguar-ը եզրագիծը հատեց միայն 9-րդ հորիզոնականում: Այս հանգամանքից էլ հրաշալի օգտվեց Techeetah-ից Անդրե Լոթերերը, որն էլ բարձացավ պատվո պատվանդանի երրորդ աստիճանին:

Իսկ առջևում Փարիզի Գրան-պրին է, որը նույնպես ուշագրավ պայքար է խոստանում և որին մենք միասին կհետևենք Formula E առաջնության անվադողերի միակ մատակարար՝ Michelin ընկերության Հայաստանյան ներկայացուցչի՝ «Վիտեսս» ընկերության աջակցությամբ:

ՄՐՑԱՇԱՐՅԻՆ ԱՂՅՈՒՍԱԿԸ 

1. Ժ-Է.Վերն – 119 միավոր

2. Ս.Բյորդ – 101 միավոր

3. Ֆ.Ռոզենքվիստ – 82 միավոր

4. Ս.Բուեմի - 60 միավոր 

5. Դ.Աբտ – 50 միավոր

1. Techeetah – 152 միավոր

2. Virgin Racing – 118 միավոր

3. Mahindra Racing – 103 միավոր

4. Audi Sport ABT Shaeffler – 89 միավոր

5. Panasonic Jaguar Racing - 88 միավոր