Volvo Trucks ընկերությունը պաշտոնապես ներկայացրեց իր առաջին էլեկտրական բեռնատարը՝  FL Electric մոդելը: Աղմուկի ցածր մակարդակը թույլ կտա շահագործել ավտոմեքենան գիշերային ժամերին, իսկ վնասակար արտանետումների զրոյական մակարդակը՝ փակ տերմինալների տարածքներում և բնապահպանական գոտիներում: 

 

16 տոննա զանգվածով բեռնատարի ուժային ագրեգատը բաղկացած է 252 ձ.ուժ հզորությամբ էլեկտրական շարժիչից  (425 Նմ ոլորող մոմենտ), երկաստիճան փոխանցումային համակարգից և լիթիում-իոնային մարտկոցների բլոկից, որոնց տարողունակությունը տատանվում է 100-ից 300 կիլովատ-ժամ: Արագ լիցքավորման ռեժիմում մարտկոցները կարելի է լիցքավորել մեկ-երկու ժամում, իսկ կենցաղային էլեկտրացանցից սնուցման դեպքում այդ գործընթացը կպահանջի շուրջ 10 ժամ:  Մեկ ամբողջական լիցքավորումից հետո  Volvo FL Electric-ը կարող է հաղթահարել մինչև 300 կիլոմետր:

Volvo-ի էլեկտրական բեռնատարների առաջին գնորդները կլինեն Renova ընկերությունը, որը մասնագիտացված է աղբի հավաքման և վերամաշակման ոլորտում, և բեռնափոխադրումներով զբաղվող TGM կոնցերնը: Volvo FL Electric բեռնատարի զանգվածային սերիական արտադրությունը կսկսվի 2019 թ.:

Հիշեցնենք, որ ավելի վաղ ներկայացվել էր նաև E-FUSO Vision One մոդելը, որը արտադրվում է Daimler-ին պատկանող Mitsubishi Fuso Truck and Bus Corporation (MFTBC) ընկերության կողմից: Այս էլեկտրական բեռնատարը մեկ լիցքավորումով կարող է անցնել մինչև 350 կիլոմետր և տեղափոխել 11 տոննա բեռ: