Ինչպես և ամեն տարի՝ այս անգամ էլ Տոկիոյի ավտոսրահը հարուստ է զանազան կոնցեպտներով, որոնց հիմնական «մատակարարներն» են ճապոնական ընկերություններն են: Բնականաբար, դրանց թվում չէր կարող չլինել նաև Yamaha ընկերությունը, որը ցուցադրեց ասես ապագայից հյուր եկած հրաշք-մոտոցիկլը:

Այս ֆուտուրիստական փոխադրամիջոցը թերևս մեկ բացասական կողմ ունի՝ այն չի կարողանում թռչել: Եվ եթե այն այսքան նման չլիներ մոտոցիկլներին, մասնավորապես՝ իր արտաքինով, կարելի կլիներ մտածել, որ մեր առջև ուղղակի հերթական ռոբոտն է:

Այս ապարատի արհեստական բանականությունն ունակ է ճանաչել տիրոջը դեմքով, կարող է փոխհամագործակցել մարդու հետ և օգնել նրան զանազան ճանապարհային իրավիճակներում: Այլ կերպ ասած՝ պիլոտն ու մեքենան պետք է հասնեն ամբողջական ներդաշնակության: Yamaha-ն դա անվանում է ճապոներեն «Կանդո» բառով, որը նշանակում է «միաժամանակ խորը բավարարվածության և ինչ-որ բացառիկ բանի հետ հանդիպումից առաջացող ուժեղ հուզմունքի զգացում»:

Motoroid-ը, բնականաբար, աշխատում է էլեկտրական էներգիայով, որը կուտակվում է սարքի երկու կողմից տեղադրված փայլուն «տակառիկներում»: Ստորև բերված տեսանյութը գաղափար է տալիս այն մասին, թե ինչպես է աշխատում Yamaha-ի հրաշք-սարքը: