Ավտոմոբիլային արդյունաբերությունը հետզհետե, թեկուզ և դժկամորեն, ստիպված է ընդունել, որ էլեկտրական ավտոմեքենաները դառնում են հաջորդող ժամանակաշրջանի կարևորագույն մասը: Պատահական չէ, որ բոլոր առաջատար երկները ստիպված են լինում այս կամ այն կերպ արտահայտել իրենց դիրքորոշումը այս թեմայի շուրջ: 

Այս պարագայում բնական էր, որ արձագանք կլինի նաև աշխարհի ամենամեծ բնակչությունն ունեցող և խոշորագույն ավտոշուկան համարվող Չինաստանից: Այստեղ արդեն գործում է քվոտավորման օրենք, որի համաձայն բոլոր ավտոդիլերները պարտավորվում են վաճառել որոշակի քանակությամբ էլեկտրական ավտոմեքենաներ, հակառակ դեպքում դրանց գործունեությունը կարող է դադարեցվել: Գնալով ավելի հեռու՝ Չինաստանի արդյունաբերության փոխնախարար Սին Գուոբինը հայտարարեց, որ երկրում իշխող կոմունիստական կուսակցությունը լրջորեն դիտարկում է ավանդական վառելիքով աշխատող ավտոմեքենաների արտադրության և վաճառքի ամբողջական արգելքի հնարավորությունը:

Ճիշտ է, ի տարբերություն Նորվեգիայի, Ֆրանսիայի, Նիդերլանդների կամ ԱՄՆ-ի, Չինաստանի համար ոչ մի հստակ տարեթիվ դեռ չի մատնանշվում: Սակայն կառավարությունում արդեն իսկ ձեռնարկվում են մի շարք քայլեր համապատասխան ժամանակացույցը ստեղծելու համար:

«Այս քայլը կտրուկ ազդեցություն կունենա ավտոարդյունաբերության զարգացման վրա»,- նշել է փոխնախարարը, հավելելով, որ ոլորտին սպասում են «անհանգիստ» ժամանակներ: 

Հիշեցնենք, որ Չինաստանի խոշորագույն քաղաքներն աչքի են ընկնում օդի ախտոտվածության ամենաբարձր մակարդակով աշխարհում, ինչը ստիպում է իշխանություններին ձեռնարկել հնարավոր ամեն բան իրավիճակը շտկելու համար: Անցումը էլեկտարական ավտոմեքենաներին կարող է դառնալ ամենաարդյունավետ լուծումներից մեկը:

Հետաքրքիր է նշել, որ արդեն այս տարվա առաջին կիսամյակի տվյալներով Չինաստանում կրկնակի քանակով ավելի էլեկտրական ավտոմեքենա է վաճառվել, քան մինչ այդ ոլորտի առաջատարը համարվող ԱՄՆ-ում: Պետք չէ մոռանալ նաև որ Չինաստանի ավտոմոբիլաշինությունը զարգանում է աննախադեպ արագությամբ, և այս որոշումը նաև ուղղված է համաշխարհային տենդենցներին համահունչ արտադրության զարգացմանը: