Ժնևի ավոտսրահը ոչ միայն առաջատար ավտոարտադրողների սերիական ավտոմեքենաների ցուցադրման վայրն է: Այս տարի այնտեղ կներկայացվի Ֆորմուլա E առաջնության նոր բոլիդը, որը կտրամադրվի թիմերին 2018-2019 թթ մրցաշրջանում: 

Նոր ավտոմեքենայի դիզայնը նախագծել է Spark Racing Technologies ընկերությունը, որը պատկանում է Ֆորմուլա 1-ի Renault F1 թիմի նախկին ղեկավար Ֆրեդերիկ Վասյորին: SRT-ն շասսիներ է մատակարարում էլեկտրական Ֆորմուլային սերիայի մեկնարկի հենց առաջին օրվանից: 

Բոլիդի մարտկոցները մատակարարելու է Ֆորմուլա1-ում անուն հանած ևս մեկ ընկերություն՝ McLaren Applied Technologies-ը: Մարտկոցների տարողունակությունը մեծացել է գրեթե կրկնակի՝ 28-ից հասնելով 54 կիլովատ-ժամի: Դա նշանակում է, որ մարտկոցները կարող են դիմանալ մրցավազքի ողջ տարածությանը, և մրցարշավորդներն էլ կարիք չեն ունենա ընթացքում փոխել բոլիդը, ինչպես դա արվում է այսօր, հետևաբար որոշակի փոփոխությունների կենթարվի նաև առաջնության կանոնակարգը: Միևնույն ժամանակ առաջնության ավտոդողերի միակ պաշտոնական մատակարարը մնում է Michelin ընկերությունը: