Mercedes-Benz ընկերությունը իր Youtube-ալիքում երեկ պաշտոնապես ներկայացրեց նոր A-դասի թիզեր-տեսանյութը: Մինչ այդ գերմանացիները հայտարարել էին նոր մոդելի պաշտոնական նորամուտի օրն ու վայրը:

Հայտնի է, որ լայն հանրությանը նոր A-դասի Mercedes-ը կցուցադրվի փետրվարի 2-ին Ամստերդամում: Ենթադրվում է, որ ավտոմեքենան շուկա կհանվի թե հեչբեք, թե սեդան թափքերով, սակայն լուսանկարներն ու տեսանյութը վկայում են, որ արտադրողը դեռևս շեշտը դնում է ավանդական հեչբեք լուծման վրա:

Նախնական տվյալներով նոր հեչբեքը կառուցված է մոդերնիզացված MFA հենահարթակի հիման վրա, իսկ ավտոմեքենայի առաջնամասի դիզայնն իրականացված է վերջին սերնդի Mercedes-Benz CLS մոդելի ոճով: Ակնկալվում է, որ նոր A-դասը կհամալրվի 1,3-լիտրանոց տուրբոշարժիչով, որը նախագծվել է Daimler-ի կողմից Renault-Nissan-Mitsubishi ալյանսի հետ համատեղ: Բացի այդ նորույթը ժամանակի պահանջներին համահունչ կհամալրվի հիբրիդային ուժային ագրեգատով և բնականաբար կառաջարկվի նաև AMG տարբերակով, որի հզորությունը կգերազանցի 400 ձ.ուժը: