Իտալական Ares Design թյունինգային աթելիեն չի վախենում ցանկացած բարդության աշխատանքից: Օրինակ, այն կարող է Bentley Mulsanne-ը վերածել կուպեի, իսկ Lamborghini Huracan-ը՝ De Tomaso Pantera մոդելի ժամանակակից կրկնօրինակի: Պատահական չէ, որ իտալացիների վերջին նախագիծը ոչ պակաս տարօրինակ է՝ կաբրիոլետ թափքով…Tesla Model S:

Իտալական աթելիեն, որը պատկանում է Lotus  ընկերության նախկին տնօրեն Դենի Բահարին, անհատական պատվերով նախագծել և իրականացրել է Tesla Model S ավտոմեքենայի կաբրիոլետ տարբերակը: Ընդ որում մեքենան ոչ միայն պարզապես զրկվել է տանիքից, այլև սարքավորվել է մեկ այլ՝ գործվածքային ծալվող տարբերակով: Այն հարմարեցնելու համար անհրաժեշտ է եղել ամբողջությամբ փոփոխել հետնամասի կառուցվածքը, ներառյալ բեռնախցիկը:

Ընդհանուր ձևափոխությունների ցանկը բավական մեծ է: Ստանդարտ Tesla-ն զրկվել է տանիքից, հետևի դռներից և կենտրոնական կանգնակներից: Անվտանգությունը ապահովելու համար անհրաժեշտ է եղել լրացուցիչ ուժեղացնել շասսին և լոնժերոնները առջևի և հետևի նստատեղերի հատվածում: Առանձին երկարացվել են առջևի դռները: Բացի այդ, Ares-ի մասնագետները կաբրիոլետ Model S-ի համար նախագծել են թափքի՝ ածխապլաստիկից պատրաստված տարրեր և հետևի նոր նստատեղեր, իսկ սրահը պաստառապատվել է ձյունաճերմակ կաշվով՝ սևի ու նարնջագույնի կոնտրաստային շեշտադրումներով: