ՆՈՐՈՒԹՅՈՒՆՆԵՐ

ՍԻՐՈՎ`ՌՈՒՍԱՍՏԱՆԻՑ

Tweet

Այն, ինչին ռուսաստանցի ավտոսիրողները սպասում էին դեռևս 2010թ.-ից ի վերջո տեղի ունեցավ: Սոչիում կայացավ Ռուսաստանի պատմության մեջ առաջին Գրան-Պրին, որը դարձավ այս տարվա կարևորությամբ երկրորդ նշանակալից իրադարձությունը այդ սևծովյան հանգստավայրի համար՝ ձմեռայյին օլիմպիական խաղերից հետո: Եվ չնայած մրցուղին բոլորովին նոր էր, զուտ մրցումն ընդացավ այս տարի արդեն սովորական և դրանով իսկ ոչ նոր սցենարով, այն է՝ Mercedes-ի ճնշիչ առավելությամբ և Հեմիլթոն-Ռոսբերգ զույգի հերթական հաղթական դուբլով:

Արդեն իսկ ազատ մրցելույթների ժամանակ պարզ դարձավ, որ մրցուղու նոր լինելու պատճառով պիլոտները լուրջ խնդիրներ կունենան անվադողերի տաքացման հարցում: Pirelli-ն տրամադրել էր երկու միջին կազմերը, և երկար ժամանակ թիմերը պարզապես հարմարվում էին նոր ասֆալտին: Պետք է նշել, որ ի սկզբանե մրցափուլին մասնակցում էր ոչ թե 22, այլ 21 մարզիկ: Marussia թիմը, որը նախապես հայտարարել էր՝ Ճապոնիայում ծանր վնասվածք ստացած Բյանկիին Ռոսսիով փոխարինելու մասին, վերջին պահին որոշեց այնուամենյնիվ չհայտարարագրել ամերիկացուն: Որակավորման առաջին հատվածում անսպասելի խնդիրների բախվեց Ֆելիպե Մասսան: Williams-ի բրազիլացի պիլոտը չկարողացավ հաղթահարել առաջին հատվածի արգելքը, ինչի պատճառը բոլիդի տեխնիկական պրոբլեմներն էին: Մասսային "ընկերակցեցին” Չիլթոնը, Քոբայաշին, Էրիքսոնը և Մալդոնադոն: 

Երկրորդ  հատվածում, ինչպես և առաջինում, բոլորից արագ էր Լյուիս Հեմիլթոնը, իսկ հետագա պայքարից դուրս մնացին համապատասխանբար Ֆեթելը, Հյուլկենբերգը, Պերեսը, Սութիլը և Գրոժանը:

Դեռևս ուրբաթօրյա ազատ մրցելույթների ժամանակ բոլորին թված, թե այս անգամ Mercedes-ին կարող են մարտահրավեր նետել Williams-ի ու McLaren-ի պիլոտները: Սակայն երրորդ հատվածում գերմանական թիմի ներկայացուցիչները ոչ մի հնարավորություն չտվեցին մրցակիցներին, չնայած Վալթեի Բոթթասը մոտ էր իսկական սենսացիա գրանցելուն: Հեմիլթոնն ու Ռոսբերգը կրկին միմյանց մեջ խաղարկեցին փոուլը: Այս անգամ այն բաժին հասավ 2008թ. բրիտանացի աշխարհի չեմպիոնին, ով թիմակցից առաջ անցավ երկու տասներորդական վայրկյանով: Բոթթասը երրորդն էր: Իրեն լավագույնս դրսևորեց տեղացի հանդիսատեսի սիրեցյալ՝ ռուսաստանցի Դանիիլ Քվյատը, որի անունով արդեն հասցրել են կոչել Սոչիի մրցուղու տրիբունաներից մեկը: Հաջորդ տարի Red Bull-ում հանդես գալու հրավեր ստացած Քվյատը սխրանք գործեց՝ գրավելով 5-րդ հորիզոնականը և միմյանցից բաժանելով ընդհանուր առմամբ վստահ ելույթ ունեցած McLaren-ի պիլոտներ՝ Ջենսոն Բաթոնին և Քևին Մագնուսենին: Ռիկյարդոն, Ալոնսոն, Ռայկկոնենը և Վերնը համապատասխանաբար գրավեցին 7-10 հորիզոնականները:

Հաջորդ օրը՝ կիրակի, նշված վերջին չորս մարզիկներն ինչպես նաև 11-րդ արդյունքը ցույց տված Ֆեթելը առանց որևէ ջանք գործադրելու մեկական հորիզոնական վեր բարձրացան, քանի որ Մագնուսենը պատժվել էր 5 տեղով՝ փոխանցման տուփի ոչ պլանային փոխարինման համար: Այս հանգամանքը որոշակի ինտրիգ հաղորդեց մրցավազքին: Շատերին հետաքրքրում էր՝ արդյոք կկարողանա դանիացին վերականգնել դիրքերը:

Ի ուրախություն McLaren-ի երկրպագուների Մագնուսենն արդեն մեկնարկին կարողացավ ամբողջովին հետ բերել կորցրած հինգ դիրքերը՝ հայտնվելով վեցերորդ հորիզոնականում: Դրան նպաստեց նաև Նիկո Ռոսբերգի թույլ տված սխալը, ով հենց մեկնարկային ուղու վրա կտրուկ արգելակեց և վնասեց անվադողերը: Արդյունքում գերմանացին ստիպված էր հենց այդ շրջանին այցելել բոքսեր ու այնուհետ մինչև վանդակավոր դրոշի ի հայտ գալը երթևեկել անվադողերի միևնույն կոմպլեկտով: Երեսուն շրջան պահանջվեց Ռոսբերգից՝ կրկին երկրորդ տեղում հայտնվելու համար: Ճիշտ է այդ ընթացքում Հեմիլթոնն արդեն հասցրել էր զգալիորեն պոկվել մնացած մրցակիցներից:

Արդյունքում նա 13 վայրկայնով շուտ հատեց եզրագիծը, քան Նիկոն: Պատվո պատվանդանի 3-րդ հորիզոնականը բաժին հասավ Վալթերի Բոթթասին: Երիտասարդ ֆինլանդացին իրոք հիանալի մրցաշրջան է անցկացնում: Հաջողված կարելի է համարել նաև McLaren-ի ելույթը, որը լավագույնն էր այս թիմի համար՝ սկսած դեռևս Ավստրալիայից, երբ Ռիկյարդոյի որակազրկման հետևանքով երկու պիլոտներն էլ հայտնվեցին պատվո պատվանդանին: Ռուսաստանում Բաթոնն ու Մագնուսենը համապատսխանաբար 4-րդն ու 5-րդն էին: Այս արդյունքը թույլ տվեց բրիտանական թիմին Կոնստրուկտորների գավաթի պայքարում շրջանցել Force India-ին և հույսեր փայփայել՝ Ferrari-ի հետ պայքարելու մասին: Սոչիում միավորներ վաստակեցին նաև Ալոնսոն, Ռիկյարդոն, Ֆեթելը, Ռայկկոնենը և Պերեսը: 

Mercedes-ի հերթական դուբլն արդեն իններորդն էր այս մրցաշրջանում և թույլ տվեց "Արծաթյա նետերին” վաղօրոք նվաճել Կոնստրուկտորների Գավաթը: Գրեթե ոչ-ոք չի կասկածում, որ անհատական հաշվարկի չեմպիոնի կոչումը ևս կխաղարկեն գերմանական թիմի պիլոտները: Ներկայումս Լյուիս Հեմիլթոնն ընդամնեը 17 միավորով է առաջ Ռոսբերգից: Եվ վերջինս, անկասկած, փորձելու է մնացած երեք Գրան-Պրիներում ետ բերել մինչ այդ կորցրածը:

Իսկ մոտ ասպագայում մեզ սպասում է արդեն դասական դարձաց Օսթինի Գրան-Պրին ԱՄՆ-ում: