Ճապոնական Nissan ընկերությունը պաշտոնապես ներկայացրել է շրջանակային X-Terra ամենագնացը: Յոթտեղանի այս մոդելը, որը կառուցված է Navara պիքապի հիման վրա, առանձնանում է նոր դիզայնով, փոփոխված ինտերիերով և հասանելի կլինի միայն մեկ շարժիչով: 

Նոր Nissan X-Terra-ն իրականացված է մակնիշին բնորոշ դասական ոճով: Ամենագնացի առաջնամասը ստացել է Patrol-ի ոճով ձևավորված ճաղավանդակ, զանգվածեղ թափարգել՝ լրացուցիչ պաշտպանությամբ, ինչպես նաև նոր լուսադիոդային օպտիկա՝ ցերեկային ընթացքի C-աձև կրակներով: Մոդելի թափքի համար հասանելի է յոթ երանգ, այդ թվում վառ դարչնագույնը և բորդոն: 

Nissan X-Terra-ի սրահում ուշադրություն են գրավում երեք շարքով դասավորված նստատեղերը, ընդ որում երկորդ և երրորդ շարքերը ավելի բարձր են տեղադրված, ինչն ապահովում է հետևի ուղևորների ավելի լավ տեսադաշտը: Լրամշակման համար օգտագործված են սև և բաց մոխրագույն երանգի նյութեր: Բացի այդ, ամենագնացը ստացել է սարքավորումների թվային վահանակ, 9-դյույմանոց սենսորային էկրան, ինչպես նաև հետևի ուղևորների համար նախատեսված 11-դյույմանոց ծալվող դիսփլեյ:

Ակտիվ անվտագության նոր ֆունկցիաներից X-Terra-ն համալրվել է շարժման շարքից շեղվելը կանխող համակարգով, «կույր գոտիների» հայտնաբերման և նախազգուշացման տեխնոլոգիայով, ինչպես նաև ճակատային բախումների մասին նախազգուշացնող ինտելեկտուալ համակարգով: Այս բոլոր օպցիաները հասանելի կլինեն ամենաբարձր՝ Platinum համալրման վարորդներին:

Նոր Nissan X-Terra-ն սարքավորվում է միմիայն 2,5-լիտրանոց քառագլան բենզինային շարժիչով, որը զարգացնում է 165 ձ.ուժ հզորություն և 241 Նմ ոլորող մոմենտ:  Այն համակցվում է 7-աստիճան ավտոմատ փոխանցումատուփի հետ:  Մոդելի դինամիկ բնութագրերը դեռևս ամբողջությամբ չեն գաղտնազերծվել, սակայն հայտնի է, որ այն համալրվելու է մշտական լիաքարշ համակարգով՝ հետևի դիֆերենցիալի էլեկտրոնային բլոկավորմամբ: 

Նոր Nissan X-Terra-ն վաճառքի կհանվի մերձարևելյան շուկաներում արդեն 2020 թվականի դեկտեմբերին, իսկ դրա արժեքի և այլ տարածաշրջաններում հասանելիության վերաբերյալ տեղեկությունները դեռևս հայտնի չեն: