ՆՈՐՈՒԹՅՈՒՆՆԵՐ

ՄԱՍՍԱՅԻ ՎԵՐԱԴԱՐՁԸ ԵՎ ՖԵՐՐԱՐԻԻ ԱՆԿՈՒՄԸ ՄՈՆՑԱՅՈՒՄ

Tweet

Սեպտեմբերի 7-ին հանրահայտ Մոնցա ավտոմայրուղում կայացավ Ֆորմուլա 1 2014թ. առաջնության Իտալիայի Գրան-Պրին, որն ավանդաբար համարվում է ամենաարագներից մեկն օրացույցում և տրիբունաներում հավաքում ավտոսպորտի տասնյակ հազարավոր երկրապգուների: Վերջիններիս մեծ մասը, բնականաբար, գալիս են ոգևորելու առասպելական Ferrari-ի մրցարշավորդներին, որոնք սակայն վաղուց չեն ուրախացրել հաղթանակներով, և դժվար է պատկերացնել՝ թե ինչպես "կարմիր նժույգները” կարող են մարտահրավեր նետել այս տարվա բացահայտ առաջատար՝ Mercedes-ին: Ավելին. Մոնցայի փուլից հետո ընդհանուր հաշվարկում նրանք առաջ թողեցին նաև Williams թիմին:

Ավանդաբար Մոնցան առանձնանում է նրանով, որ այստեղ օգտագործվում է եզակի աէրոդինամիկ փաթեթ, որն ստեղծվում է բացառապես հենց այս մրցափուլի համար: Այն աչքի է ընկնում հնարավորինս նվազագույն սեղմիչ ուժով, ինչը թույլ է տալիս զարգացնել առավելագույն արագություններ: Հաշվի առնելով Mercedes մակնիշի շարժիչների այս տարի ունեցած առավելությունը մնացած բոլոր արտադրողներ նկատմամբ՝ դժվար չէր պատկերացնել, որ այս մրցուղում առաջատարների թվում կլինեն հենց գերմանական ընկերության "հաճախորդները”:

Pirelli-ի մասնագետները Իտալիա էին բերել երկու ամենակոշտ տեսակի անվադողերը՝ Medium և Hard:  Առաջին տեսակը մոտ 0.6 վայրկայնով շրջանին ավելի արագ էր երկրորդից, ինչը թույլ էր տալիս թիմերին զանազան մարտավարություններ կիրառել՝ սկսած արդեն իսկ որակավորման փուլից:  Ավանդաբար առաջին հատվածն անհաղթահարելի եղավ Caterham-ի և Marussia-ի մրցարշավորդների համար: Ընդ որում կրկին պադդոկ վերդարձած Կամուի Կոբայաշին կարողացավ փոքրիկ հաղթանակ տոնել՝ այդ քառյակի մեջ գրավելով առաջին տեղը: Անսպասելի թույլ ելույթ ունեցան Lotus-ները: Թե Պասթոր Մալդոնադոն, թե Ռոմեն Գրոժանը չկարողացան անցնել որակավորման երկրորդ հատված, իսկ ֆրանսիացին հետագայում բողոքեց, որ այս ուիկ-էնդի ընթացքում նրա վարած մեքենան վատագույնն էր իր ողջ կարյերայի ընթացքում:

Երկրորդ հատվածում բոլոր մրցարշավորդներն անմիջապես անցան ավելի փափուկ տեսակ անվադողերին: Պայքարը սուր էր: Բավական է նշել, որ ռուսաստանցի Դանիել Քվյատն ընդամենը 0.002 վայրկայն զիջեց 10-րդ տեղը գրաված Սերխիո Պերեսին՝ Force India-յով: Փուլի համար պայքարից դուրս մնացին նաև Կիմի Ռայկկոնենը, Ժան-Էրիկ Վերնը, Նիկո Հյուլկենբերգը, Ադրիան Սութիլն ու Էսթեբան Գուտյերեսը:

Որակավորման եզրափաակիչ հատվածում իրեն զգացնել տվեց Mercedes շարժիչների հզորությունը: Առաջին վեց տեղերը զբաղեցրին հենց այդ շարժիչներով համալրված բոլիդները: Ինչպես և սպասվում էր առաջին շարքը բաժին հասավ Mercedes-ի գործարանային թիմին: Փուոլը նվաճեց Լյուիս Հեմիլթոնը՝ Ռոսբերգից առաջ անցնելով չորս հարյուրորդական վայրկայնով: Սա 36-րդ նման հաջողությունն էր նրա կարյերայում: Մեկնարկային դաշտի երկրորդ հորիզոնականն ամբողջությամբ գրավեցին Williams-ի մրցարշավորդները: Հինգերորդ ու վեցերորդ տեղերը բաժին հասան McLaren-ի պիլոտներին, ընդ որում նորեկ Մագնուսենը կրկին կարողացավ առաջ անցնել փորձառու Ջենսոն Բաթոնից: Միայն Ֆերնանդո Ալոնսոն կարողացավ պայքարել Ferrari-ի պատվի համար՝ նվաճելով մեկնարկային 7-րդ դիրքը: Իսպանացուն հետևում էին երկու Red Bull-ներն, իսկ տասնյակն, ինչպես արդեն նշվեց, եզրափակեց մեքսիկացի Սերխիո Պերեսը:

Տեխնիկական խնդիրները խոչընդոտեցին Հեմիլթոնի մեկնարկը, և բրիտանացին առաջ թողեց թիմակցին: Վատ մեկնարկեցին նաև Վալթերի Բոթթասն ու Դանիել Ռիկյարդոն: Օգտվելով մեկնարկային խառնաշփոթից՝ երկրորդ տեղ դուրս եկավ Քևին Մագնուսենը: Զգալի առաջընթաց ցուցադրեց նաև Նիկո Հյուլկենբերգը: Միայն մի քանի շրջան անց ավելի արագ մեքենաներով մրցարշավորդները կարողացան վերադառնալ պայքարի մեջ և սկսեցին հետզհետե վերականգնել կորցրած դիրքերը: Հեմիլթոնը դուրս եկավ երկրորդ տեղ՝ ճնշման տակ առնելով Ռոսբերգին, որն էլ տեղի տվեց և սխալվեց առաջին շիկանում, ինչի հետևանքով բրտանացին հայտնվեց առաջատարի DRS գոտում: Իր պայքարն էր այդ ընթացքում մղում Բոթթասը, ով 14-րդ տեղում հայտնվելուց հետո, ձգտում էր հնարավորինս արագ հայտնվել պելոտոն առաջնամասում: Արդեն 15-րդ շրջանին ֆինլանդացին հայտնվեց 8-րդ, իսկ մի քանի շրջան անց՝ նույնիսկ չորրորդ տեղում:

Մրցավազքի միջնամասում Նիկո Ռոսբերգը երկրորդ անգամ սխալվեց մրցուղու նույն հատավծում, և այս անգամ Հեմիլթոնին հաջողվեց շրջանցել գերմանացուն: Շատերին թվաց՝ թե Նիկոն յուրահատուկ ոճով փոխհատուցեց նախորդ մրցափուլում իր կատարած արարքի համար: Սակայն ինքը՝ մարզիկը, կտրականապես հերքեց այդ կարծիքը: Այդ ընթացքում պայքարից դուրս մնաց Ferrari-ի առաջատար՝ Ֆերնանդո Ալոնսոն, ինչը հիասթափություն առաջացրեց հավաքված մարզասերների մոտ:

Հետաքրքիր ու անզիջում պայքարի կիզակետում կրկին հայտնվեցին երկու McLaren-ները: Այս անգամ նրանց մրցակիցներն էին Վալթերի Բոթթասը, Սերխիո Պերեսն ու Դանիել Ռիկյարդոն: Ինչպես և Սպա-Ֆրանկորշամում մի փոքր տաքարյուն գտնվեց երիտասարդ դանիացի Քևին Մագնուսենը, ով ոչ կորեկտ շարժումով ստիպեց Բոթթասին դուրս գալ մրցուղուց: Մրցավարներն աննկատ չթողեցին այս դրվագը և պատժեցին մեղավորին՝ 5 վայրկյան տուգանք ավելացնելով նրա վերջնական արդյունքին: Դրա հետևանքով Մագնուսնեը վերջնական դասակարգման աղյուսակում զբաղեցրեց ընդամենը 10-րդ հորիզոնականը՝ առաջ թողնելով Ռայկկոնենին, Բաթոնին և Պերեսին: Վերջին երկուսը շուրջ 15 շրջան կատաղի մենամարտ էին տանում միմյանց հետ, որում առավել հաջողակ դուրս եկավ մեքսիկացի պիլոտը: Իսկ հաղթանակը, արդեն իսկ սովորական դարձածի պես, նվաճեցին երկու Mercedes-ները: Հեմիլթոնը 7 միավորով կրճատեց տարբերությունը Ռոսբերգից: Հաջորդ երկու հորիզոնականները, ինչպես և մեկնարկային դաշտում, բաժին հասան Williams-ի մրցարշավորդներին: Սակայն այն տարբերությամբ, որ բրազիլացի Ֆելիպե Մասսան վերջապես կարողացավ առաջ անցնել թիմակցից և երկարատև ընդմիջումից հետո բարձրացավ պատվո պատվանդանին: Հենց այս կրկնակի հաջողությունն էլ թույլ տվեց Քլեր Ուիլյամսի ղեկավարած թիմին շրջանցել Ferrari-ին Կոնստրուկտորների Գավաթի հաշվարկում և դուրս գալ երրորդ տեղ: Իսկ երկրորդ հորիզոնականը թիմային պայքարում շարունակում է պահպանել Red Bull թիմը: Հենց ավստրիական այս թիմի երկու մարզիկներն էլ Մոնցայի եզրագիծը հատեցին 5-րդ և 6-րդ տեղերում: Ու կարծես թե արդեն պատահական չէ, որ հերթական անգամ աշխարհի վերջին տարիների անփոփոխ չեմպիոն՝ Սեբաստիան Ֆեթելը զիջեց ավստրալացի Դանիել Ռիկյարդոյին: Այս երիտասարդը, թվում է, մեծ ասելիք ունի Ֆորմուլա 1-ում:

Իսկ թիմերը այսուհետ կմեկնեն Սինգապուր, ուր կկայանա առաջնության տասնչորսերորդ փուլը: