ՆՈՐՈՒԹՅՈՒՆՆԵՐ

ԲՐԱԶԻԼԱԿԱՆ ԿԱՐՆԱՎԱԼ՝ ԳԵՐՄԱՆԱԿԱՆ ԵՐԱՆԳԵՆՐՈՎ

Tweet

Վերջին երեք տարիներին Ֆորմուլա 1-ի մրցաշրջանն ավարտվում էր Սան-Պաուլուում՝ Բրազիլիայի Գրան-Պրիով: Հաճախ հենց այստեղ էր որոշվում չեմպիոնական կոչումի ճակատագիրը: Սակայն 2014-ին այս փուլը նախավերջինն էր և տիտղոսի համար պայքարում որոշիչ նշանակություն չուներ, քանի որ ըստ ընդունված կանոնակարգի վերջին փուլում՝ Աբու-Դաբիում խաղարկվելու են կրկնակի միավորներ: Դա նշանակում է, որ նույնիսկ 24 միավորի տարբերությունը, որն ուներ Լյուիս Հեմիլթոնը թիմակից՝ Նիկո Ռոսբերգի նկատմամբ բավարար չէր բոլոր հարցերը լուծելու համար: Այնուամենայնիվ ավանդույթի համաձայն Mercedes-ի պիլոտները ոչ մի հնարավորություն չտվեցին մրցակիցներին: Թիմը գրանցեց հերթական ռեկորդը՝ մրցաշրջանում գրանցելով 11-րդ դուբլը, այս անգամ Ռոսբերգ-Հեմիլթոն հերթականությամբ: 

Ինչպես և Օսթինում Բրազիլիայի Գրան-Պրիին մասնակցեցին ընդամնեը 9 թիմեր՝ Marussia-ն և Caterham-ը չժամանեցին Հարավային Ամերիկա: Այդ պատճառով որակավորման մրցումներն անցան ԱՄՆ-ում փորձարկված ռեժիմով. Առաջին հատվածից հետո պայքարից դուրս պետք է մնային չորս ամենադանդաղ մեքենաները: Այս անգամ անհաջողակների քառյակը կազմված էր երկու Lotus-ներից՝ Գրոժան-Մալդոնադո զույգ, ինչպես նաև Force India-ն ներկայացնող Սերխիո Պերեսից և Toro Rosso-ի պիլոտ՝ Ժան-Էրիկ Վերնից: Հետաքրքիր է, որ երկրորդ Toro Rosso-ն՝ ռուսատսանցի Դանիիլ Քվյատի ղեկավարմամբ նույնպես այլևս դուրս չեկավ մրցուղի: Հաշվի առնելով պիլոտի հետաձգված տուգանքը, որի պատճառով նա այսպես, թե այնպես պետք է յոթ տեղ կորցներ՝ նախորդ փուլում շարժիչի փոխարինման պատճառով: Բացի Քվյատից հետագա պայքարից դուրս մնացին նաև երկրորդ Force India-ն՝ Նիկո Հյուլկենբերգի ղեկավարմամբ, և երկու Sauber-ները՝ Էսթեբան Գուտյերես-Ադրիան Սութիլ կազմով: 

Որակավորման երրորդ հատվածն, ինչպես և երկու նախորդներն ու բոլոր ազատ մրցելությներն անցան Mercedes-ի ճնշիչ առավելությամբ, որին ինչ-որ կերպ փորձում էին հակադարձվել Williams-ի պիլոտները: Հեմիլթոնն ու Ռոսբերգը մեկը մյուսի հետևից ցուցադրում էին լավագույն արդյունքը: Ի վերջո բախտը ժպտած գերմանացուն. Նիկոն նվաճեց այս մրցաշրջանում իր տասներորդ փոուլը և արժանացավ այդ ցուցանշի համար սահմանաված FIA մրցանակին: Հետաքրքիր է, որ առաջին ութ մարզիկների արդյունքները տեղավորվեցին ընդամենը մեկ վայրկյանի միջակայքում: Երկու Mercedes-երին մեկնարկային դաշտում հետևեցին երկու Williams-ները՝ Մասսա-Բոթթաս հերթականությամբ: Առաջին տասնյակում տեղ զբաղեցրին նաև Ջենսոն Բաթոնը, Սեբասթյան Ֆեթելը, Քևին Մագնուսենը, Ֆերնանդո Ալոնսոն, Դանիել Ռիկյարդոն և Կիմի Ռայկկոնենը: 

Բրազիլիայում սովորաբար որոշիչ դեր է խաղում եղանակը: Սակայն այս տարի ուիք-էնդի բոլոր փուլերն անցան չոր եղանակային պայմաններում, ինչը զգալիորեն ազդեց անվադողերի ընտրության և դրանց աշխատանքի վրա: Pirelli-ն այս մրցափուլի համար տրամադրել էր Medium և Soft տեսակի անվադողեր: Սակայն բոլորովին նոր ասֆալտի վրա առավել փափուկ կազմով անվադողերը շատ արագ էին մաշվում, և թիմերը գերադասեցին հիմնականում պայքարել Medium-ով համալրված բոլիդներով: Պատահական չէ, որ գրեթե բոլոր պիլոտները, բացառությամբ Հյուլկենբերգի, Գրոժանի, Քվյատի և Սութիլի նախընտրեցին մեկնարկել Soft-ով և արագորեն ձերբազատվեցին դրանցից՝ արդեն 5-ից 9-րդ շրջանների միջակայքում: 

Մրցավազքի ընթացքը չէր առանձնանում արտառոց իրադարձություններով: Պիլոտները հանգիստ լուծում էին իրենց առջև դրված խնդիրները: Մասսան ընթացքում ստացավ 5 վայրկյանանոց տուգանք՝ պիթ-լեյնում թույլատրված արագությունը գերազանցելու համար: Քսանհնգերորդ շրջանին պիլոտները զարմանալի համաչափությամբ էին ընթանում՝ երկու Mercedes, երկու Willams, երկու McLaren, որոնց հետևում էին Ferrari-ի ու Red Bull-ի երկուական ներկայացուցիչները: Սակայն հերթական պիթ-ստոպի ժամանակ խնդիրներ ծագեցին Վալթեր Բոթթասի մեքենայի հետ, ինչի պատճառով երիտասարդ ֆինլանդացին կորցրեց բարձր տեղեր գրավելու բոլոր հնարավորությունները: Փորձելով հասնել Ռոսբերգին՝ Հեմիլթոնը սխալվեց և դուրս թռավ մրցուղում, սակայն կարողացավ վերադառնալ և պահպանել երկրորդ տեղը: Քառասուներորդ շրջանին առջևի կախոցների անսարքության պատճառով պայքարից դուրս մնաց Դանիել Ռիկյարդոն: 

Վերջին պիթ-ստոպի ժամանակ Մասսան շփոթեց սեփական բոքսերը՝ մի պահ կանգ առնելով  McLaren-ի մեխանիկների առջև, սակայն կարողացավ մրցուղի վերդառնալ երրորդ տեղում: Իսկ Հեմիլթոնին այդպես էլ չհաջողվեց առաջ անցնել Ռոսբերգից: Գերմանացին վստահորեն վերահսկում էր իրավիճակը և թույլ չտվեց Լյուիսին նույնիսկ գրոհ ձեռնարկել: Ի ուրախություն տասնյակ հազարավոր բրազիլացի երկրպագուների Ֆելիպե Մասսան բարձրացավ պատվո պատվանդանի երրորդ աստիճանին՝ ևս մեկ անգամ ապացուցելով Williams-ի գերազանց մարզավիճակը: Իր լավագույն ելույթներից մեկն ունեցավ Ջենսոն Բաթոնը: Աշխարհի չեմպիոնը դեռևս չգիտի՝ կմնա արդյո՞ք Ուոկինգի թիմում, թե չէ, և նման հաջողությունը կարող է որոշիչ լինել: Բաթոնի թիմակիցը՝ դանիացի Մագնուսենը, երկար ժամանակ ընթանում էր 5-րդ տեղում, սակայն անվադողերի մաշվածության պատճառով չկարողացավ պահպանել այդ հորիզոնականը՝ առաջ թողնելով Ֆեթելին, երկու Ferrari-ները և Նիկո Հյուլկենբերգին՝ Force India-ից: Մրցափուլի անհաջողակ՝ Բոթթասը վաստակեց մեկ միավոր տասներորդ տեղը գրավելու համար:

Այսպիսով Հեմիլթոնի և Ռոսբերգի միջև միավրոների տարբերությունը կրճատվեց մինչև 17 միավորի, և չեմպիոնի տիտղոսը կխաղարկվի Աբու-Դաբիում: Մեզ մնում է սպասել երկու շաբաթ՝ 2014 թ մրցաշրջանն ամփոփելու համար: